„ევროპული საქართველოს“ ერთ-ერთი ლიდერი სერგი კაპანაძე, სოციალურ ქსელში ვიდეოს აქვეყნებს, რომელშიც ასახულია ექსპერიმენტი, რომელიც მათ განათლების სამინისტროში ჩაატარეს. კერძოდ მათ შეამოწმეს, რა პროცედურებს გადის საჩივრის წერილი უწყებაში მოხვედრის დროს და რამდენად შესაძლებელია, რომ არასრული პირადი მონაცემების მქონე წერილი სამინისტროს მიეღო, როგორც ეს მზია კერზარიას სკოლის წინააღმდეგ მიმართული საჩივრის წერილის დროს მოხდა.

„დღეს ჩავატარეთ მინი ექსპერიმენტი განათლების სამინისტროში. მივიტანეთ წერილი/საჩივარი (რა თქმა უნდა, ფიქტიური), რომელსაც აწერია ფიქტიური სახელი და გვარი და ფიქტიური მისამართი (ზუსტად ისე, როგორც ლავრენტი ქირიას ანონიმკის შემთხვევაში).

განათლების სამინისტროში, რა თქმა უნდა, გვიპასუხეს, რომ ასეთ საჩივარს არ მიიღებენ.

სახელი და გვარი და მისამართი თუ აწერია, მაშინ პირადი ნომერი და ტელეფონი უნდა ეწეროსო.

ლავრენტი ქირიას ანონიმკას სახელი და გვარი და მისამართი ეწერა. პირადი ნომერი და ტელეფონი - არა.

ლავრენტი ქირიას ანონიმკა მაინც ჩაიბარეს.

არათუ ჩაიბარეს, მის საფუძველზე ეგზეკუცია მოაწყვეს. ნახევარ დღეში გააფორმეს მივლინება.

8 ნოემბრის 14:30-ზე შევიდა ქირიას საჩივარი, მინისტრი 2 წუთში გაეცნო. 3 საათში მთელი სისტემა შემოიარა წერილმა. 18:00-ზე ეგზეკუციის მოწყობის მინისტრის ბრძანება განთავსდა ელექტრონულ სისტემაში და მივლინების ბრძანება დაიწერა 18:01-ზე! ტექსტი მაინც როგორ აკრიფეს ამ 1 წუთში?

ზუგდიდში გენინსპექციის ჯგუფი გაემგზავრა 9 ნოემბრის დილის 4, ამ 5 საათზე, რადგან 10 სთ-ზე უკვე მე-6 საჯარო სკოლაში იყვნენ.

ტყუილს მოკლე ფეხები აქვს, განათლების მინისტრო!”- წერს სერგი კაპანაძე.

შეგახსენებთ: ზუგდიდის მე-6 საჯარო სკოლის დირექტორი ია კერზაია დეკემბრის დასაწყისში გარდაიცვალა. ის ინსულტის დიაგნოზით, საავადმყოფოში მძიმე მდგომარეობაში იმყოფებოდა, თუმცა ექიმებმა მისი გადარჩენა ვერ შეძლეს.

ოჯახი პოლიტიკურ ზეწოლაზე საუბრობს. გარდაცვალებამდე ზეწოლაზე საუბრობდა თავად ია კერზაიაც. ის ამბობდა, რომ სთხოვდნენ საარჩევნო პროცესებში ჩართვას და სალომე ზურაბიშვილის სასარგებლოდ ხმების მობილიზებას. უარის მიღების შემდეგ კი მის სკოლაში ინსპექტირების სამსახური შევიდა.