ზუგდიდის მე-6 საჯარო სკოლის დირექტორის, ია კერზაიას გარდაცვალების საქმე - საპარლამენტო უმცირესობის წევრები პროკურატურას მიმართავენ და მოითხოვენ, არსებულ ყველა კითხვას დაუყოვნებლივ პასუხი გაეცეს.

„ევროპული საქართველოს“ წევრი ირაკლი აბესაძე აცხადებს, რომ უნდა გაირკვეს, ვინ იყვნენ ია კერზაიას წინააღმდეგ პოლიტიკური ნიშნით დაწყებული დევნის ორგანიზატორი და შემსრულებლები.

„პროკურატურამ სასწრაფოდ უნდა გასცეს პასუხი შეკითხვებს - ვინ ახდენდა „ქართული ოცნების“ სასარგებლოდ პოლიტიკური ნიშნით ზეწოლას ია კერზაიაზე, ვინ მიიღო გადაწყვეტილება, პოლიტიკური ნიშნით, დირექტორის თანამდებობიდან გათავისუფლების შესახებ, ვინ დაგეგმა ის სადამსჯელო ოპერაცია,რომელიც განხორციელდა ქალბატონ ია კერზაიას მიმართ, ვინ მონაწილეობდა ამ ყველაფრის ორგანიზებაში, ვინ იყვნენ შემსრულებლები, რა თქმა უნდა, ეს ადამიანები უნდა დაისაჯონ, რომ მომავალში ხელისუფლებას არ გაუჩნდეს ცდუნება პოლიტიკურ ნიშნით მოახდინოს ადამიანებზე ზეწოლა, პოლიტიკური ნიშნით მოხდეს ადამიანების რეპრესირება და დასჯა,“- განაცხადა ირაკლი აბესაძემ.