„ეს მივიღეთ საქართველოს ხელისუფლების უგუნური პოლიტიკის გამო, რომელსაც რუსეთთან მიმართებაში ატარებს"- ოპოზიცია ბორდერიზაციაზე

პოლიტიკა - 09:58, 07 Feb, 2019

952

გორის რაიონის სოფელ ხურვალეთში ოკუპანტების გააქტიურებას ხელისუფლების უუნარობას უკავშირებენ ოპოზიციაში.

საპარლამენტო უმცირესობის დეპუტატები ამბობენ, რომ ბორდერიზაცია არ შეჩერებულა, ხელისუფლება კი მომხდარ ფაქტზე პოსტფაქტუმ რეაგირებს.

„ეს ჩვენ მივიღეთ საქართველოს ხელისუფლების უგუნური პოლიტიკის გამო, რომელსაც რუსეთთან მიმართებაში ატარებს. ეს დაწოლა მხოლოდ საქართველოს ხელისუფლებაზე, რომ მიდიოდეს, ნამდვილად ავიტანდით ყველა, მაგრამ საქმე ეხება ჩვენი ტერიტორიების დაკარგვას,“ - აცხადებს ზაალ უდუმაშვილი.

"ევროპული საქართველოს" ერთ-ერთი ლიდერი სერგი კაპანაძე ხელისუფლების პასიურობაზე ამახვილებს ყურადღბას.

„საკმაოდ დიდი ტერიტორია დავკარგეთ ამ ბორდერიზაციის შედეგად, სამწუხაროა,რომ საქართველოს ხელისუფლების რეაგირება არის ყოველთვის დაგვიანებული, ყოველთვის ჯერ რაღაც ხდება და შემდეგ რეაქციის რეჟიმშია ხელისუფლება. ჩვენ ის დროც გვახსოვს, როცა ამბობდნენ, რომ პირიქით რეაგირება საჭიროც კი არ არის“-ამბობს სერგი კაპანაძე.

უმრავლესობა კი ამ ეტაპზე მნიშვნელოვნად სამშვიდობო ფორმატის შენარჩუნებას ასახელებს.

„ვიმედოვნებ, რომ ყველა იმ საერთაშორისო ფორმატში, რომლითაც ხდება მშვიდობიანი მოლაპარაკების კოორდინაცია შევძლებთ, რომ ხელშესახები შედეგები იქნა მიღწეული, ამ ეტაპისთვის მთავარი მიღწევა შეიძლება ითქვას, რომ ომიდან 10 წლისთავზე ჩვენ სამშვიდობო ფორმატს ვინარჩუნებთ მასშტაბური ინტერვენციების შესახებ,“-ამბობს საპარლამენტო უმრავლესობის დეპუტატი მარიამ ჯაში.

ოკუპანტებმა სოფლის გასასვლელთან სათვალთვალო კოშკი დაამონტაჟეს. რუსი მესაზღვრეები სამუშაოებს ოკუპირებული ტერიტორიის მხრიდან ატარებენ.