ის არის პასუხისმგებელი ყველაფერზე, რაც მოხდა კერზაიას საქმესთან დაკავშირებით - ოპოზიცია მინისტრთან მწვავე კითხვებით მიდის

პოლიტიკა - 09:32, 07 Feb, 2019

737

ია კერზაიას საქმე და სკოლებში დირექტორებსა და პედაგოგებზე წინასაარჩევნო პერიოდში ზეწოლა ეს ის კითხვებია რასაც ოპოზიცია პარლამენტში მისულგანათლების მინისტრს დაუსვამს.

გაერთიანებული ოპოზიციის ლიდერები და "ნაციონალური მოძრაობის" წარმომადგენლები ბატიაშვილს მოუწოდებენ, რომ ზუგდიდის მეექვსე სკოლის დირექტორის გარდაცვალებაზე პასუხისმგებლობა უწყებამ საკუთარ თავზე აიღოს.

სესიის შემდეგ მიხეილ ბატიაშვილი განათლების კომიტეტში გადაინაცვლებს, სადაც სხდომას ია კერზაიასშვილიც დაესწრება.

ხატია დეკანოიძე მინისტრს საკუთარ სიტყვებს ახსენებს.

"არჩევნებზე ძალადობამ გამოიწვია ამ ადამიანის გარდაცვალება. იგი არის პასუხისმგებელი ყველაფერზე, რაც მოხდა კერზაიას საქმესთან დაკავშირებით. ასევე უნდა ვთქვათ, რომ მან ერთხელ განაცხადა, რომ ის მზად არის აიღოს მორალური პასუხისმგებლობა და მე პირადად ამ კითხვას დავუსვამ მინისტრს - მორალური პასუხისმგებლობა ეს ნიშნავს იმას, რომ აქამდე ის თანამდებობას არ უნდა იკავებდეს,"-აცხადებს ხატია დეკანოიძე.

ფრაქცია ”ევროპული საქართველო - მოძრაობა თავისუფლებისთვის” წევრი, სერგი კაპანაძე ამბობს, რომ "პრაქტიკულად განათლების მინისტრის უშუალო მონაწილეობით იქნა ეს ეგზეკუცია ჩატარებული სკოლაში".

"რასაც მერე შეეწირა ქალბატონი ია კერზაიას სიცოცხლე, ამაზე გვექნება ძალიან ბევრი კითხვა. გარდა ამისა ასევე კითხვები გვექნება იმ კვაზირეფორმაზე, რომელიც მან დაანონსა, რაც ჯერჯერობით რაც ვიცით, გულისხმობს მხოლოდდამხოლოდ გამოცდების გაუქმებას,"- აცხადებს კაპანაძე.

უმრავლესობაში კი კერზაიას საქმეზე არ საუბრობენ და მინისტრთან შეკითხვები სასკოლო განათლების რეფორმაზე ექნებათ.

"განათლების სისტემა დღეს სკოლის დონეზე არის ჩავარდნილი, ამას საუბარი არც უნდა და ყველა აღიარებს. გამოცდები რა ფორმითაც ტარდება არის აბსოლუტურად არაეფექტიანი,"-აცხადებს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე, აკაკი ზოიძე.