"მინდოდა მეჩვენებინა ჩემი სახლი, ჩემი სამშობლო, მაგრამ 2 თვე ციხეში ვიჯექით" - ლუკა ჩხეტია და მასთან ერთად გათავისუფლებული მებრძოლები უკრაინაში დაბრუნდნენ

პოლიტიკა - 10:36, 05 Feb, 2019

1486

თბილისში ჩატარებული სპეცოპერაციისას დაკავებული „დონბასის“ მებრძოლი ლუკა ჩხეტია და მასთან ერთად კიდევ 4 პირი უკრაინაში გაემგზავრნენ.

„არ ვიცი რა უნდა ვთქვა. ძალიან მრცხვენია მომხდარის გამო. ბიჭები ჩამოვიდნენ საქართველოში დასასვენებლად. მინდოდა მეჩვენებინა ჩემი სახლი, ჩემი სამშობლო. მაგრამ გამოვიდა ისე, რომ 2 თვე ციხეში ვიჯექით და ახლა უკან ვბრუნდებით. არაფრის თქმა არ შემიძლია იმის გარდა, რომ ეს დიდი სირცხვილია. ოდესმე დადგება დრო როდესაც ყველა სიმართლეს გაიგებს,”-განაცხადა ჩხეტიამ.

უკრაინელი მებრძოლები კი ამბობენ, რომ ისინი დამნაშავეები არ ყოფილან და ეს სასამართლომაც დაადგინა.

„უკვე ყველაფერი რიგზეა, სახლში მივემგზავრებით. ჩვენ ჩამოვედით როგორც ტურისტები და აღმოვჩნდით ტერორისტები. კარგია, რომ ქართული სამართალდამცველი ორგანოები გაერკვნენ ვითარებაში. არავინ არაფერშია დამნაშავე. ყველა გათავისუფლებულია და სახლში ბრუნდება,”-ამბობს უკრაინის მოქალაქე როლანდ მელია.

შინაგან საქმეთა სამინისტრომ უკრაინის მოქალაქეები რამდენიმე თვის წინ დააკავა. მათ გამოძიება ჯგუფურად ცეცხლსასროლი იარაღის, საბრძოლო მასალის, ან ასაფეთქებელი მოწყობილობის მართლსაწინააღმდეგო შეძენა, შენახვას ედავებოდა.