სპეციალური კომისია ავლაბრის რეზიდენციის მომავალზე იმჯელებს - სასახლეს შესაძლოა მაღალი რანგის სტუმრების მიღების ფუნქცია შეუნარჩუნდეს

პოლიტიკა - 18:18, 04 Feb, 2019

847

სპეციალური კომისიის წევრებმა, რომელმაც ავლაბრის რეზიდენციის სამომავლო ფუნქცია უნდა განსაზღვროს, დღეს პრეზიდენტის სასახლე დაათვალიერეს. კვირა დღეს საპარლამენტო უმრავლესობის წევრებსა და ბიძინა ივანიშვილს შორის გამართული შეხვედრის შემდეგ ცნობილი გახდა, რომ პრეზიდენტის ავლაბრის სასახლეში შესაძლოა ქართული კულტურის მუზეუმი განთავსდეს.

პარლამენტის წევრის ენძელა მაჭავარიანის თქმით, კომისია ხვალ შეიკრიბება და პროექტის ავტორთან ერთად იმსჯელებს. მაჭავარიანის ინფორმაციით ძირითადი სასახლე რჩება მაღალი რანგის სტუმრების მიღებისთვის და ინარჩუნებს დაახლოებით, იმ ფუნქციას, რაც ახლა აქვს, ოღონდ არა მხოლოდ პრეზიდენტისთვის, არამედ პრემიერისთვის, საგარეოს ხელმძღვანელისთვის:

„დავათვალიერეთ იმიტომ, რომ ზოგიერთ ჩვენგანს ნანახიც არ ჰქონდა. მე ერთხელ ვიყავი ნამყოფი იმ სასახლეში და უბრალოდ, წარმოდგენა რომ გვქონოდა. ხვალ იქნება შეხვედრა და განვიხილავთ რა მოთხოვნებია, რა უნდა იყოს და როგორ უნდა იყოს. რამდენადაც ამ ეტაპისთვის ჩემთვის ცნობილია, ძირითადი სასახლე რჩება მაღალი რანგის სტუმრების მიღებისთვის და ინარჩუნებს დაახლოებით, იმ ფუნქციას, რაც ახლა აქვს, ოღონდ არა მხოლოდ პრეზიდენტისთვის, არამედ პრემიერისთვის, საგარეოს ხელმძღვანელისთვის, ვისთვისაც საჭირო იქნება, თავად პრეზიდენტისთვის და ა.შ რომ იქ მიღებული იყოს მაღალი რანგის სტუმრები. დანარჩენი რა იქნება, ხვალ შევიკრიბებით, პროექტის ავტორი მობრძანდება, ბატონი გიგა ბათიაშვილი და განვიხილავთ, რა შეიძლება იყოს და რა განთავსდეს იქ. ადმინისტრაციის ნაწილზე არის საუბარი.“ - განაცხადა ენძელა მაჭავარიანმა.

პრეზიდენტის სასახლის სამომავლო ფუნქცია დღის წესრიგში მას შემდეგ დადგა, რაც საქართველოს მე-5 პრეზიდენტმა მასში შესვლაზე უარი თქვა და რეზიდენციად ათონელზე მდებარე სასახლე აირჩია.