ფრაქცია „ნაციონალური მოძრაობის“ თავმჯდომარე რომან გოცირიძე ჭიდაობის ფედერაციაში მიმდინარე პროცესებზე საუბრობს. მისი თქმით, დღეს „ცხვრის დაკვლა“ არის გამოსავალი სიტუაციიდან, რადგანაც ქვეყანაში არ არსებობს სასამართლო სისტემა.

„კონსტრუქციული წინადადებით შემოვდივარ. ჩვენ ვიცით, რომ ქვეყანაში არ არსებობს სასამართლო სისტემა. როდესაც ათეულ ათასობით ადამიანის თვალწინ თავგაბზარული ევროპის ჩემპიონის სურათი ვიხილეთ და ის ადამიანი, რომელმაც მას თავი გაუტეხა, სასამართლომ გაათავისუფლა 5 ათასი ლარის გირაოს სანაცვლოდ, ეს მაშინ, როდესაც კირკიტაძე ახლა ციხეში ზის.

როდესაც სასამართლო არ არის, თქვენ გამოსავალს სწორად მიაგენით. ძიუდოისტებმა ერთმანეთს იაპონიაში დაამტვრიეს თავ-ყბა, მაგრამ ნაცვლად იმისა, რომ სასამართლოში წასულიყვნენ, დაკლეს ცხვარი და ეკლესიამ შეარიგა.

ამიტომ გირჩევთ, თუ ძიუდოისტების შერიგება ხდება ცხვრის დაკვლით, დაკალით ერთი ცხვარი და გადაჭერით პრობლემა ჭიდაობის ფედერაციაში“, - განაცხადა დეპუტატმა.