“iPhone 5”, რომელიც პირადი ცხოვრების ამსახველ კადრებში ჩანს, 2012 წლის ბოლოს გამოვიდა - ოპოზიცია კადრების უკან ხელისუფლების კვალს ხედავს

პოლიტიკა - 15:09, 04 Feb, 2019

5953

გაერთიანებული ოპოზიცია "ძალა ერთობაშიას" წევრი, "ნაციონალური მოძრაობის" ერთ-ერთი ლიდერი, ხატია დეკანოიძე ამბობს, რომ ბიძინა ივანიშვილის ხელისუფლებამ პირადი ცხოვრების გადაღება და ამ კადრებით მანიპულირება ახალ სიმაღლეებზე აიყვანა.

ხელისუფლების ოპონენტები ეხმაურებიან პირადი ცხოვრების ამსახველების კადრებში “iPhone”-ის დაფიქსირებას, რომელიც 2012 წლის ბოლოს გამოვიდა. მაშინ როცა ხელისუფლებაში ბიძინა ივანიშვილის გუნდი იყო.

"ბიძინა ივანიშვილის ხელისუფლების მხრიდან ფარულ ჩანაწერებზე აპელირება და მცდელობა გადააბრალოს ოპოზიციას არის ფარისევლობა. არცერთი ობიექტური გამოძიება არ ჩატარებულა ფარული მიყურადებისა და თვალთვალის კადრების გავრცელებასთან დაკავშირებით. არ ყოფილა ობიექტური ექსპერტიზა არც ერთ გავრცელებულ კადრებზე. არ ჩაუტარებიათ საერთაშორისო ექსპერტიზა, არ ყოფილა დასჯილი არცერთი გამავრცელებელი"- ამბობს დეკანოიძე.

საპარლამენტო უმცირესობის წევრი ოთარ კახიძე აღნიშნავს, რომ თუკი 2012 წლამდე ადგილი ჰქონდა უკანონო თვალთვალსა და მიყურადებას ახლა უკვე ამას გავრცელებაც დაემატა.

“2012 წლამდე უკანონო თვალთვალი და მიყურადება იყო პრობლემა, ამიტომ ამას არ აქვს მნიშვნელობა. შვიდი წლის განმავლობაში სისტემატურად გვაქვს სახეზე ხელისუფლების პოლიტიკური პრობლემა და ამ პრობლემის ადრესატის წინააღმდეგ კადრების გავრცელება. ეს იყო ეკა ბესელიას შემთხვევაში, ეს იყო მანამდე ორი პოლიტიკოსი ქალის შემთხვევაში, რომელსაც ასევე ივანიშვილი დაუპირისპირდა, ეს იყო მანამდე ჟურნალისტის შემთხვევაში , რომლის დროსაც შს მინისტრის მოადგილე არ დაუსჯიათ, ის პირობითი მსჯავრით გათავისუფლდა. ამიტომ ხელისუფლების ხელწერაა, რომ მათ შვიდი წლის განმავლობაში ახალ სიმაღლეზე აიყვანეს უკანონობა. უკანონო მიყურადებასა და თვალთვალს უკვე დაამატეს გავრცელება არასასურველი კანდიდატების მიმართ,“-ამბობს ოთარ კახიძე.

“ქართული ოცნების“ მმართველობის პირობებში გავრცელებულ პირადი ცხოვრების ამსახველი ერთ-ერთი ვიდეოდან „კვირის აქცენტებმა“ ყურადღება ერთ კონკრეტულ კადრზე გაამახვილა.

ეს ფოტო ვიდეომასალიდან ამტკიცებს, რომ ჩანაწერის გაკეთება 2012 წლის 1 ოქტომბრის არჩევნებამდე და ხელისუფლების შეცვლამდე ვერ მოხდებოდა.

კადრში ჩანს მობილური ტელეფონი “iPhone 5", რომლის პრეზენტაცია კალიფორნიაში 2012 წლის 12 სექტემბერს შედგა, გაყიდვაში კი მხოლოდ 21 სექტემბრიდან გამოვიდა, ისიც შეერთებული შტატების ბაზარზე და არა საქართველოში.