თავმოკვეთილი თემიდა და მურუსიძე - იუსტიციის უმაღლესი საბჭოს მდივნისთვის პროტესტს ფორმა მიუღებელია

პოლიტიკა - 13:15, 04 Feb, 2019

901

იუსტიციის უმაღლესი საბჭოს წევრებისთვის, საპროტესტო პლაკატების გაკვრა მიუღებელია. საუბარია პლაკატზე, რომელზეც მოსამართლე ლევან მურუსიძეს თავმოკვეთილი თემიდასთან ერთად არის გამოსახული.

საქართველოს იუსტიციის უმაღლესი საბჭოს მდივანი, თავმჯდომარის მოვალეობის შემსრულებელი, გიორგი მიქაუტაძე ამბობს, რომ აღნიშნული პლაკატები შეურაცხმყოფელია.

„ნამდვილად არ მინახავს და ვიცი გადმომცეს, რომ ასეთი რაღაც იყო. ეს პირველი შემთხვევა არ არის, ნაცნობი ხელწერაა ასე ვთქვათ. მსგავსი ფორმებით და კიდევ უფრო უარესით შესაძლებელია, რაღაც მოსაზრებების გამოხატვა და დაფიქსირება. ჩემთვის არის აბსოლუტურად მიუღებელი,“ - ამბობს მიქაუტაძე.

სასამართლო სისტემაში შექმნილ ვითარებაზე სამოქალაქო პროტესტს მიესალმება საქართველოს იუსტიციის უმაღლესი საბჭოს არამოსამართლე წევრი, ნაზი ჯანეზაშვილი.

„მოვლენები, რომლებიც ვითარდება იუსტიციის უმაღლეს საბჭოში ბუნებრივად იწვევს საზოგადოების კრიტიკას და პროტესტს, ამიტომ, ის ფორმა, რითიც საზოგადოება გამოხატავს პროტესტს აქცია იქნება ეს თუ სხვა ფორმით გამოხატული, თუ, რა თქმა უნდა, კანონს არ არღვევს, არის ნორმალური, რადგან ისეთი ვითარებაა სასამართლო სისტემაში, რომ პროტესტის გარდა სხვა გამოსავალი აღარ დარჩა. ამიტომ, ვფიქრობ, რომ იუსტიციის უმაღლესი საბჭოს წევრებმა უნდა გააცნობიერონ თუ რა დამოკიდებულებაა საზოგადოებაში სასამართლოსთან დაკავშირებით და უნდა განახორციელონ ადეკვატური რეაგირება და მიიღონ ადეკვატური ზომები,“ - განაცხადა ნაზი ჯანეზაშვილმა.

კარიკატურებისგან ტერიტორია ამ დროისთვის უკვე გაასუფთავეს, იუსტიციის უმაღლესი საბჭოს სხდომა კი გაურკვეველი მიზეზით გადაიდო.