რის საფუძველზე გაიცა სოციალური მიზნით გათვალისწინებული თანხები „ქართული ოცნების“ კოორდინატორებისთვის - ამის გარკვევას დილიდან ცდილობდა საკრებულოს დეპუტატი ლევან ხაბეიშვილი, რომელიც ვაკის რაიონის გამგებაში იმყოფებოდა.

ხაბეიშვილი ნოდარ ტურძელაძისგან დოკუმანტაციის გაცემას ითხოვდა, თუმცა გამგებელმა დეპუტატს დოკუმენტაციის მიცემაზე უარი უთხრა, რის შემდეგადაც ხაბეიშვილმა ადგილზე საპატრულო პოლიცია გამოიძახა.

ლევან ხაბეიშვილის თქმით, რადგან მას გამგებელი არ აძლევს დოკუმენტაციის გაცნობის უფლებას, იძულებული გახდა ადგილზე საპატრულო პოლიცია გამოიძახოს.

„გამგებელმა საბიუჯეტო სახსრები გამოიყენა „ქართული ოცნების“ კოორდინატორების დასახმარებლად. ეს დასტურდება კონკრეტული დოკუმენტაციით. გამგეობაში იმისთვის მოვედით, რომ მე, როგორც საკრებულოს და სარევიზიო კომისიის წევრი სრული უფლება მაქვს დედნებში გავეცნო განცხადებას, რომლითაც „ქართული ოცნების“ კოორდინატორებმა მიმართეს გამგეობას. ამ განცხადებაში ნახავთ, რომ ეს ადამიანები არ არიან სოციალურად დაუცველები და რეალობაში გაღატაკებული და გაჭირვებულების თანხა მიითვისა გამგებელმა.

მე ვითხოვდი თუ რის საფუძველზე მოხდა ამ თანხის გადარიცხვა გამგებლის მიერ კოორდინატორებზე, თუმცა ამ ადამიანებმა ამის საშუალება არ მომცეს. არგუმენტად მითხრეს, რომ ეს არის პირადი ინფორმაცია. მე ვარ საკრებულოს დეპუტატი, მაკონტროლებელი ორგანოს წარმომადგენელი, რადგან არ მაძლევენ ამის საშუალებას, გამოვიძახე პოლიცია.

ამ გამგეობაში ინახება დოკუმენტაცია, რომელიც საბოლოოდ უნდა იქცეს სისხლის სამართლის დევნის დაწყების საფუძველი გამგებელზე. საპატრულო პოლიციამ უნდა უზრუნველყოს რომ არ განადგურდეს ეს დოკუმენტაცია“, - განაცხადა ლევან ხაბეიშვილმა.