ენერგოუსაფრთხოების საკითხებზე შექმნილი სამუშაო ჯგუფი დღეს პარლამენტში შეხვედრას გამართავს. საუბარი იქნება იმ რეგულაციებზე, რომელმაც არსებული რისკები უნდა შეამციროს. განიხილება ამ მიმართულებით სხვა ქვეყნების გამოცდილებაც.

ჯგუფის შემადგენლობაში პარლამენტის წევრები, სემეკისა და ეკონომიკის სამინისტროს წარმომადგენლები, ასევე ბიზნეს და ენერგოომბუდსმენები შედიან.

სოფო კილაძის განმარტებით, სამუშაო ჯგუფის მიზანია, რომ ქვეყნაში ბუნებრივი აირის მოხმარების უსაფრთხოების წესები ევროპულ სტანდარტებს მიუახლოვდეს:

„ჯგუფი იმუშავებს იმ რეგულაციაზე, რაც ვფიქრობთ, აუცილებელია, რათა მოხდეს ბუნებრივი აირით გამოწვეული უბედური შემთხვევების მინიმალიზება. ეს არის სერიოზული პრობლემა ჩვენი საზოგადოებისთვის, რადგან ვხედავთ, რომ ბოლო პერიოდში ბევრი ფატალური შემთხვევა იყო უსაფრთხოების ნორმებთან დაკავშირებული. ვფიქრობთ, აუცილებლად უნდა მოვიძიოთ საერთაშორისო, განსაკუთრებით ევროპული ქვეყნების გამოცდილება, სადაც ნამდვილად უზრუნველყოფილია, დეტალებში რეგლამენტირებულია ბუნებრივი აირის მოხმარების უსაფრთხოების ზომები. ვფიქრობ, მათ შორის საერთაშორისო ექსპერტების დახმარებითაც, შევძლებთ, რომ ჩვენს ქვეყნაში ბუნებრივი აირის მოხმარების უსაფრთხოების წესები ევროპულ სტანდარტებს მივუახლოვოთ, რაც ბუნებრივია, დაიცავს ჩვენი მოქალაქეების სიცოცხლისა და ჯანმრთელობის უფლებას.“ – განაცხადა სოფო კილაძემ.

შეგახსენებთ, 16 იანვარს დიდ დიღომში ავთანდილის ქუჩაზე მდებარე კორპუსში ბუნებრივი აირის დაგროვების შედეგად აფეთქება მოხდა, რომელმაც 4 ადამიანი, მათ შორის ბავშვი იმსხვერპლა. 31 იანვარს კი ქეთევან წამებულის გამზირზე გაზის ნამწვით 7 ადამიანი გაიგუდა.