რა ბედი ელის ავლაბრის სასახლეს - პრეზიდენტის რეზიდენციის სამომავლო ფუნქციაზე სპეციალური ჯგუფი იმსჯელებს

პოლიტიკა - 10:31, 04 Feb, 2019

825

ავლაბარში მდებარე პრეზიდენტის სასახლის სამომავლო ფუნქციაზე სპეციალური ჯგუფი იმსჯელებს, რომელიც საპარლამენტო უმრავლესობის ფორმატში შეიქმნა და პირველ შეხვედრას ხვალ გამართავს.

ჯგუფში, რომელშიც 7 დეპუტატია, შედიან საპარლამენტო უმრავლესობის ლიდერი და ფრაქცია „ქართული ოცნების“ თავმჯდომარე. ერთ-ერთი წინადადებით, რომელიც სასახლის პროექტის ავტორს გიგა ბათიაშვილს ეკუთვნის, რეზიდენციაში შესაძლოა კულტურის ეროვნული ცენტრი და სამუზეუმო სივრცე განთავსდეს.

ჯგუფის შემადგენლობაში არ შედიან ოპოზიციის წევრები, საპარლამენტო უმცირესობის წარმომადგენლის სერგი კაპანაძის თქმით, პრეზიდენტის სასახლის ბედი ივანიშვილის ფობიებმა გადაწყვიტა.

„ჩემი აზრით ასეთ ტიპის სასახლე უნდა იყოს ქვეყნის ინტერესებიდან გამომდინარე და უნდა ემსახურებოდეს მაგალითად, თუ პრეზიდენტს არა, მინიმუმ საგარეო საქმეთა სამინისტროს მაინც. ეს იყო ახირება, რომელიც ოლიგარქს ჰქონდა. ივანიშვილს არ უნდოდა პირველივე დღიდან , რომ იქ ყოფილიყო პრეზიდენტი, რადგან ალბათ მას თავისი შიშები, ფობიები აქვს. ეს სურვილი მას ახლა შეუსრულა სალომე ზურაბიშვილმა და აქედან გამომდინარე სრულიად არ მიკვირს, რომ მისი თანაგუნდელები შეიკრიბებიან ახლა ამაზე სამსჯელოდ.“-განაცხადა სერგი კაპანაძემ.