"პარლამენტმა აიღოს გადაწყვეტილებისა და მთავარი შემრჩევის როლი" - მოსამართლეების შერჩევასთან დაკავშირებით "ოცნებაში" ისევ აზრთა სხვადასხვაობაა

პოლიტიკა - 18:17, 02 Feb, 2019

1119

დაპირისპირება "ქართულ ოცნებაში" ისევ გრძელდება. დღეს პარტიის ლიდერმა უმრავლესობის წევრები პარტიის მთავარ ოფისში შეკრიბა, თუმცა როგორც ჩანს, ბიძინა ივანიშვილმა დაპირისპირებულების ერთ აზრზე დაყვანა მაინც ვერ შეძლო.

7 საათიანი დახურული შეხვედრის შემდეგ გაირკვა, რომ მოსამართლეების შერჩევის კრიტერიუმებთან დაკავშირებით მმართველ გუნდში პრინციპულ საკითხებთან დაკავშირებით ისევ აზრთა სხვადასხვაობაა.

ეკა ბესელია ამბობს, რომ შეხვედრის დროს პრინციპულ საკითხებზე ისევ განსხვავებული მოსაზრება აქვთ გუნდის წევრებს.

ბესელია განმარტავს, რომ მთავარი როლი მოსამართლეთა შერჩევასთან დაკავშირებით პარლამენტს უნდა ჰქონდეს.

„არსებობს ორი განსხვავებული ხედვა, მე ამ ხედვას, რაც მაქვს მე და რასაც იზიარებს ბევრი ადამიანი, რაზეც ვსაუბრობდი, ეს არის გრძელი სიის წარმოდგენა და პარლამენტმა აიღოს თავის თავზე მთავარი გადაწყვეტილების მიმღების და მთავარი შემრჩევის როლი და რომ პარლამენტი იყოს ის ორგანო, სადაც მოხდება ამ დიდი სიის გაცილებით უფრო მეტი ადამიანის განხილვა, ვიდრე არის ვაკანსია უზენაეს სასამართლოში, ეს არის ძალიან მნიშვნელოვანი პრინციპი, რომ დავაზღვიოთ პროცესი, რომ იუსტიციის საბჭოს, რომელსაც არ აქვს დღეს სანდოობა, არ იყოს რეალურად ბარიერის შემქმნელი ამ პროცესში და ის იყოს მხოლოდ იმ კონსტიტუციური როლის შემსრულებელი, რაც მას აკისრია," - ამბობს ბესელია.