"გიორგი ქადაგიძე სტრუქტურულ რეფორმაში მონაწილეობაზე უარს ამბობდა"- ილიაუნის რექტორი

პოლიტიკა - 12:32, 01 Feb, 2019

1292

ილიას სახელმწიფო უნივერსიტეტის რექტორი გიგა ზედანია, ილიაუნში განხორციელებულ ცვლილებებთან დაკავშირებით ფეისბუკზე სტატუსს აქვეყნებს, მასში ასევე საუბარია ილიაუნის ბიზნეს სკოლის დეკანის პოსტიდან გიორგი ქადაგიძის მოხსნასთან დაკავშირებითაც. ინფორმაცია იმის შესახებ, რომ ილიაუნის ბიზნეს სკოლის დეკანი აღარ არის, გიორგი ქადაგიძემ გუშინ გაავცელა.

„იმ ადამიანებისთვის მინდა დავწერო რამდენიმე სიტყვა, რომლებისათვისაც ილიაუნი ძვირფასია.

გუშინ ილიას უნივერსიტეტმა მიიღო გადაწყვეტილება, დაეფუძნებინა მენეჯმენტის, ტექნოლოგიისა და განათლების ფაკულტეტი, სადაც იფუნქციონირებს ბიზნესის სკოლა, განათლების სკოლა და სხვა პროგრამები. იდეა - ერთიანი სივრცე, სადაც მაღალი ტექნოლოგიები, ბიზნესი და განათლება გადაიკვეთება. პროფესორები რჩებიან, პროგრამები რჩება, იზრდება სინერგია დისციპლინებს შორის.

ამ ფაკულტეტის სასწავლო პროცესი განხორციელდება, მათ შორის, ილიაუნის ახალ შენობაში, რომელიც სან-დიეგოს უნივერისტეტთან ერთად აშენდა და რომელიც მოიცავს სტუდენტურ სივრცეებს, ბიბლიოთეკას, ლაბორატორიებს, უახლესი ტექნიკით აღჭურვილ საკლასო ოთახებს.

შედეგად სტუდენტები მიიღებენ ბევრად უფრო კარგ სერვისს, უკეთესი ხარისხის პროგრამებსა და სასწავლო გარემოს, დასაქმების უკეთეს შანსებს.

გარდა ამისა, საბუნებისმეტყველო მეცნიერებების ფაკულტეტს ვუმატებთ სამედიცინო მიმართულებას - ინგლისურენოვანი პროგრამა მზადაა და აკრედიტაციაზე შეტანილი.

ცხადია, ეს არ არის ილიაუნის პირველი რეფორმა და არც - უკანასკნელი. ჩვენ ყოველთვის ვიყავით დინამიკური და ცვლილებებზე ორიენტირებული ინსტიტუცია.

და რას მივაღწიეთ?

ბოლო ხუთი წლის განმავლობაში:

ილიას სახელმწიფო უნივერსიტეტი გადავიდა მოწინავე პოზიციებზე ერთიან ეროვნულ გამოცდებში;

სრულად განახლდა სასწავლო ინფრასტრუქტურა; გაიხსნა საქართველოში პირველი სამრეწველო ინოვაციების ლაბორატორია;

დასრულდა და მალე ექსპლუატაციაში შევა პირველი ტექნოლოგიური კორპუსი;

სახელმწიფოსგან მივიღეთ უპირობო ავტორიზაცია (ექსპერტთა ჯგუფის ხელმძღვანელი საერთაშორისო ექსპერტია და საუკეთესო პრაქტიკად ჩაგვითვალეს სტუდენტებზე ორიენტაცია)

ილიაუნი საუკეთესო უნივერსიტეტია სამეცნიერო შედეგების თვალსაზრისით სამხრეთ კავკასიაში (იმ საერთაშორისო ბაზაში, რომელშიც 2009 წელს 2 სტატია გვქონდა გამოქვყენებული, 2018-ში 300-მდე სტატიაა ილიაუნის სახელით).

მოვიპოვეთ ყველაზე მეტი ერაზმუსის პროექტი, მათ შორის - პირველებმა და ერთადერთებმა, როგორც ევროპული უნივერსიტეტების სრულფასოვანმა პარტნიორმა;

და კიდევ მრავალი სხვა მიღწევა.

2019 წელი განვახორციელეთ სტრუქტურული რეფორმა, რომელზეც ლაპარაკი ბევრად ადრეა დაწყებული. ყველა წესის დაცვით, ყველა კოლეგიური საბჭოს ჩართვით. თუმცა გიორგი ქადაგიძე უარს ამბობდა პროცესში მონაწილეობაზე.

გავაკეთეთ რეფორმა, შევქმენით ახალი ფაკულტეტი, გამოვაცხადეთ ახალი კონკურსი დეკანის თანამდებობაზე, რომელში მონაწილეობაც ფაკულტეტის ნებისმიერ პროფესორს შეუძლია, მათ შორის გიორგი ქადაგიძესაც.

სიახლის ნამდვილად არ გვეშინია, არამედ სიახლე გვჭირდება. "მოძრაობა და მარტო მოძრაობა." ეს ბოლო რეფორმაც ამის დასტურია.

შინაარსი ესაა, პერსონალურ კინკლაობაში შესვლას არ ვაპირებ.”- წერს გიგა ზედანია.