მთავარი პროკურორის დიპლომი - დოკუმენტის მოპოვებას „საერთაშორისო გამჭვირვალობა“ სასამართლოთი შეეცდება

პოლიტიკა - 16:01, 31 Jan, 2019

1401

„საერთაშორისო გამჭვირვალობა“ მთავარი პროკურორის დიპლომის ასლის მოპოვებას ახლა უკვე სასამართლოს წესით შეეცდება. არასამთავრობო ორგანიზაციის განცხადებით, მათ 6 თვის განმავლობაში ვერ მოახერხეს მთავარი პროკურორის დიპლომის ასლის მოპოვება:

„6 თვის განმავლობაში ჩვენ ვერ მოვახერხეთ ვერც მთავრობის კანცელარიიდან, ვერც იუსტიციის სამინისტროდან და ვერც პროკურატურიდან ამ ინფორმაციის მიღება. ეს მართლაც წარმოუდგენელი რამ არის რადგან ქვეყანას აქვს გაკეთებული განცხადება იმასთან დაკავშირებით, რომ მმართველობა არის გამჭირვალე და ნებისმიერი ინფორმაციის მიღება საჯარო უწყებებიდან არის შესაძლებელი და დღეს არასამთავრობო ორგანიზაცია 6 თვის განმავლობაში ცდილობს, რომ მოიპოვოს მთავრი პროკურორის დიპლომი. იმის გამო, რომ არც არც იუსტიციის სამინისტრომ, არც მთავრობის კანცელარიამ და არც პროკურატურამ ჩვენ არ მოგვაწოდა დიპლომის ასლი ჩვენ ვიჩივლეთ სამინისტროში და უკვე ახლა სასამართლოს წესით ვცდილობთ, რომ ეს ინფორმაცია მოვიპოვოთ.“ - განაცხადა „საერთაშორისო გამჭვირვალობა - საქართველოს“ აღმასრულებელმა დირექტორმა ეკა გიგაურმა.

შეკითხვები შალვა თადუმაძის დიპლომთან დაკავშირებით გაჩნდა 2018 წლის ივლისში, როდესაც ის მთავარი პროკურორის პოსტზე ინიშნებოდა. თადუმაძეს ამ თემაზე შეკითხვები საქართველოს პარლამენტშიც დაუსვეს, რადგან ამ თანამდებობაზე საქმიანობისთვის კანონმდებლობა სისხლის სამართლის სპეციალისტის დიპლომს მოითხოვს.

პარლამენტში წარდგენილი ბიოგრაფიული მონაცემების მიხედვით, შალვა თადუმაძე 1994-1998 წლებში საქართველოს ტექნიკურ უნივერსიტეტში, სამთო ინჟინრის პროფესიას ეუფლებოდა, ხოლო 1994–1999 წლებში იურისტის განათლება თბილისის ჰუმანიტარულ ინსტიტუტში მიიღო.