ჰესების მშენებლობა პანკისის ხეობაში - ადგილობრივებს, რომლებიც აღნიშნულს ეწინააღმდეგებიან, პოლიცია ემუქრება.

ინფორმაცია ამის შესახებ „ადამიანის უფლებათა სწავლებისა და მონიტორინგის ცენტრმა“ გაავრცელა.

ჰესების მშენებლობის საკითხი უხუცესებმა სახალხო კრებაზე განიხილეს, ამის შემდეგ კი რამდენიმე უხუცესი კახეთის პოლიციის დეპარტამენტში დაიბარეს და მათი დარწმუნება ჰესების მშენებლობის აუცილებლობაში დაიწყეს.

EMC-ში აღნიშნავენ, რომ მომხდარი პირველი შემთხვევა არ არის და მსგავსმა ქმედებებმა პრაქტიკის ხასიათი მიიღო.

ორგანიზაცია საქართველოს შინაგან საქმეთა სამინისტროს მოუწოდებს, დაუყოვნებლივ შეწყვიტოს პანკისის ხეობის მოსახლეობის დაშინება და მათი გამოხატვის თავისუფლების შეზღუდვა.

"რატომღაც ამ პროცესში თავიდანვე შინაგან საქმეთა სამინისტრო გამოჩნდა და მინისტრის მოადგილე აკოორდინირებდა ამ პროცესს. ეს სააპელაციო კონტროლი სწორედ არსებული სოციალური პროცესის დასუსტებისკენ არის მიმართული. სამინისტროს მოვუწოდებთ, რომ საერთოდ გავიდეს ამ პროცესებიდან,"-აცხადებს "ადამიანის უფლებების სწავლებისა და მონიტორინგის ცენტრის" თანასწორობის პოლიტიკის პროგრამის დირექტორი, თამთა მიქელაძე.