"რა თქმა უნდა, ჩვენ რუსეთის ფედერაციის არ გვეშინია..." - ვენესუელას დროებითი ხელისუფლება აპირებს, აფხაზეთის და სამხრეთ ოსეთის დამოუკიდებლობის აღიარება უკან წაიღოს

პოლიტიკა - 15:24, 30 Jan, 2019

1336

ვენესუელას დროებითი ხელისუფლება მზად არის, აფხაზეთისა და ცხინვალის რეგიონების დამოუკიდებელ სახელმწიფოებად აღიარების გადაწყვეტილება გააუქმოს. ეს განცხადება “კურიერთან” ექსკლუზიურ ინტერვიუში ვენესუელას ეროვნული ასამბლეის მიერ ამერიკის სახელმწიფოთა ორგანიზაციაში დანიშნულმა სპეციალურმა წარმომადგენელმა გააკეთა.

„რა თქმა უნდა. თქვენ არც კი უნდა დამისვათ ეს შეკითხვა. ჩვენ არ ვაპირებთ მადუროს ადმინისტრაციის პოლიტიკის წარმოებას. ჩვენ რუსეთის ფედერაციის არ გვეშინია,“- განაცხადა ვენესუელას სპეციალურმა წარმომადგენელმა ამერიკის სახელმწიფოთა ორგანიზაციაში, გუსტავო ტარემ.

შეგახსენებთ, ვენესუელა, რუსეთთან, ნიკარაგუასთან, ნაურუსთან და სირიასთან ერთად, იმ სახელმწიფოთა შორისაა, რომელიც საქართველოს ოკუპირებულ ტერიტორიებს დამოუკიდებელ სახელმწიფოებად აღიარებენ. ტუვალუმ და ვანუატუმ კი აფხაზეთისა და სამხრეთ ოსეთის დამოუკიდებლობა აღიარება უკან წაიღეს. ვენესუელამ კი აფხაზეთისა და ცხინვალის რეგიონის დამოუკიდებლობა 2008 წლის 10 სექტემბერს აღიარა.

2019 წლის 23 იანვარს ვენესუელას პარლამენტის თავმჯდომარემ, ხუან გუაიდომ საკუთარი თავი ქვეყნის პრეზიდენტის მოვალეობის შემსრულებლად გამოაცხადა. გუაიდოს მხარს უჭერს დასავლელი ლიდერების უმრავლესობა, ის დროებით პრეზიდენტად აღიარა საქართველოს ხელისუფლებამაც.