ადამიანებმა გააცნობიერეს, რომ სიღატაკე, ეკონომიკის განუვითარებლობა, სასამართლოს დეგრადირება, კორუფციის ზრდა დემოკრატიის უკმარისობით და არაფორმალური მმართველობითაა განპირობებული

ადამიანებმა გააცნობიერეს, რომ სიღატაკე, ეკონომიკის განუვითარებლობა, სასამართლოს დეგრადირება, კორუფციის ზრდა დემოკრატიის უკმარისობით და არაფორმალური მმართველობითაა განპირობებული - რომან გოცირიძე

პოლიტიკა - 13:33, 30 Jan, 2019

804

ფრაქცია „ნაციონალური მოძრაობის“ თავმჯდომარე, დეპუტატი რომან გოცირიძე ამერიკის ეროვნულ დემოკრატიული ინსტიტუტის (NDI) მიერ ჩატარებული კვლევის შედეგებს საგანგაშოსა და დამაფიქრებელს უწოდებს.

როგორც "ნიუპოსტს" გოცირიძემ განუცხადა, დემოკრატიის უკმარისობა წარმოშობს იმ მძიმე სურათს, რომელშიც საქართველო იმყოფება და რომელსაც ქართველი საზოგადოება გრძნობს.

"შეიძლება ითქვას, რომ ადამიანებმა გვიან, მაგრამ მაინც გააცნობიერეს, რომ ქვეყანაში არსებული სიღატაკე, ეკონომიკის განუვითარებლობა, დემოკრატიის დაბალი ხარისხი, სასამართლო სისტემის დეგრადირება, კორუფციის ზრდა განპირობებულია ქვეყანაში დემოკრატიის უკმარისობით და არაფორმალური მმართველობით"- აღნიშნა "ნიუპოსტთან" რომან გოცირიძემ.
დეპუტატის შეფასებით, საზოგადოება ერთმმართველობით უკმაყოფილია.

"საზოგადოება დარწმუნდა იმაში, რომ ქვეყანაში არის ერთმმართველობა. ეს არ ნიშნავს ერთი პარტიის მმართველობას, დემოკრატიულ საზოგადოებაში ნორმალურია, როდესაც გამარჯვებული პარტია მართავს. ერთმმართველობაში იგულისხმება ერთი ადამიანის მმართველობა. ეს დასტურდება იმით, რომ მოსახლეობის ნახევარზე მეტი ამბობს, რომ ქვეყანაში არ არსებობს დემოკრატია, რაც ძალიან საგანგაშოა და დამაფიქრებელი. ამას აძლიერებს ასევე ის ფაქტიც, რომ გამოკითხულთა ზუსტად იგივე მაჩვენებელი თვლის, რომ საქართველოს მთავრობა მუშაობს ცუდად. ესეც უკავშირდება დემოკრატიის დაბალი ხარისხის გავლენას ამ თავრობის ეფექტიანობაზე. ის რომ მთავრობა უუნაროა, სწორედ დემოკრატიის უკმარისობის გამოძახილია და ამიტომ შემთხვევითი არ არის, მთავრობის ცუდი მუშაობის შედეგისა და ქვეყანაში დემოკრატიის არ არსებობის შედეგის მაღცენებელთა დამთხვევა"- განმარტავს გოცირიძე.