"აჩქარებული, წინდაუხედავი ქმედებები სიკეთეს არავის მოუტანს"- უკრაინის ეკლესიის ავტოკეფალიის საკითხზე საქართველოს საპატრიარქო განცხადებას ავრცელებს

პოლიტიკა - 10:00, 30 Jan, 2019

818

საქართველოს საპატრიარქომ გვიან ღამით უკრაინის ეკლესიის ავტოკეფალიის საკითხზე განცხადება გაავრცელა. განცხადებაში აღნიშნუალია, რომ ამ საკითხთან დაკავშირებით როგორც საქართველოს ეკლესიის წარმომადგენლებს, ასევე საერო პირებს შორის აზრთა სხვადასხვაობაა, რაც შეურაცხმყოფელი გამოთქმების და ერთგვარი შანტაჟის საბაბიც გახდა:

„უკრაინის ეკლესიისთვის ტომოსის მინიჭებამ მთელს მართლმადიდებელ სამყაროში, აზრთა სხვადასხვაობა გამოიწვია როგორც საერო, ისე სასულიერო წრეში. ჩვენთანაც გამოიკვეთა ორი მხარე, რომლებიც ცალ-ცალკე ცდილობენ, ის პოზიცია, რაც მართებულად მიაჩნიათ, ყველა საშუალებით დაიცვან. სახეზე გვაქვს სასულიერო და საერო პირთა პოლიტიკური და რელიგიური შეფასებები და განცხადებები. ამასთან არც ერთი მხარე თავს არ იკავებს შეურაცხმყოფელი გამოთქმების, ერთგვარი შანტაჟისა და დამამცირებელი ფრაზებისგან, რაც პირველ რიგში მთქმელს აყენებს ჩრდილს.

უნდა ვიცოდეთ, რომ ძალიან დიდია თითოეული ჩვენგანის პასუხისმგებლობა და აჩქარებული, წინდაუხედავი ქმედებები სიკეთეს არავის მოუტანს.

ამჟამად მთავარი არის მართლმადიდებელთა ერთობის შენარჩუნებისთვის ზრუნვა, ხელის შეწყობა იმისათვის, რომ დაცხრეს დაძაბული ვითარება და სამართლიანობაზე დაფუძნებული მშვიდობიანი გარემო შეიქმნას.

ჩვენი მცდელობა, – ლოცვით თუ საქმით, ამ ერთობისთვის უნდა იყოს მიმართული და ამიტომაც მოგმართავთ ყველას და გთხოვთ, იყოთ კორექტულნი როგორც ერთმანეთთან მიმართებაში, ისე აღნიშნულ საკითხთან დაკავშირებით.“-აღნიშნულია განცხადებაში.