გიორგი მიქაუტაძე გასაუბრებას დღეს გაივლის - უვადო მოსამართლეობის მსურველს არასრულწლოვანის ფიზიკურ შეურაცხყოფაში ადანაშაულებენ

პოლიტიკა - 10:30, 28 Jan, 2019

425

საქართველოს იუსტიციის უმაღლესი საბჭო დღევანდელი სხდომის დასრულების შემდეგ, მოსამართლეობის კანდიდატებთან გასაუბრებას გამართავს.

გიორგი მიქაუტაძე უვადო მოსამართლეობისთვის დიდი ხანია, იბრძვის. ის უზენაესი სასამართლოს მოსამართლეობის კანდიდატების იმ სადავო სიაშიც იყო, რომელმაც საპარლამენტო უმრავლესობაში დიდი დაპირისპირება გამოიწვია.

გიორგი მიქაუტაძეს ორ ვაკანტურ ადგილზე, თბილისის საქალაქო და სააპელაციო სასამართლოებში აქვს შეტანილი განაცხადი.

იუსტიციის საბჭოს არამოსამართლე წევრის, ნაზი ჯანეზაშვილის თქმით, მიქაუტაძეს სასამართლოში არსებული კლანის მხარდაჭერა აქვს.

„მას აქვს ხელში სერიოზული ძალაუფლება, მხარდაჭერა იმ კლანისა და ჩინჩალაძის მხრიდან, წინააღმდეგ შემთხვევაში იგი ვერ გაბედავდა, რომ თავისი თავი წარედგინა უზენაეს სასამართლოში დასანიშნად პარლამენტში, მეორე მხრივ, კვლავ გასაუბრებაზე გამოდიოდეს იმისთვის, რომ მისი უვადოდ გადანიშვნა მოხდეს.“- განაცხადა ნაზი ჯანეზაშვილმა.

გიორგი მიქაუტაძის უვადო მოსამართლედ გამწესებას კატეგორიულად ეწინააღმდეგება სამოქალაქო სექტორის წარმომადგენელი, თამარ ხაჭაპურიძე. ხაჭაპურიძე 2016 წლის გონიოს ინციდენტს იხსენებს, როდესაც მისი თქმით, მიქაუტაძემ მის არასრულწლოვან შვილს სიტყვიერი და ფიზიკური შეურაცხყოფა მიაყენა.

ხაჭაპურის განცხადებით, ნაცვლად იმისა, რომ სამართალდამცავებს მიქაუტაძის წინააღმდეგ აღეძრათ საქმე, მიქაუტაძემ გავლენები გამოიყენა და ფიზიკური და სიტყვიერი შეურაცხყოფის ბრალდებით თამარ ხაჭაპურიძე და მისი მეუღლეს დააკავეს.

ამ დროისათვის ხაჭაპურიძე და მისი ოჯახი პოლიტიკური დევნილის სტატუსით ბრიტანეთს აფარებს თავს.

„მან 13 წლის არასრულწლოვანს ფიზიკური დაზიანება მიაყენა და ასევე შეაგინა. ამის ვიდეოკადრები გავრცელდა Youtube-ზე,“- განაცხადა თამარ ხაჭაპურიძემ რუსთავი2-თან.