დაბეჯითებით ვურჩევ საქართველოს ხელისუფლებას, გაითვალისწინოს რეკომენდაციები საარჩევნო სისტემასთან დაკავშირებით

დაბეჯითებით ვურჩევ საქართველოს ხელისუფლებას, გაითვალისწინოს რეკომენდაციები საარჩევნო სისტემასთან დაკავშირებით - აშშ-ის ელჩის მოვალეობის შემსრულებელი

პოლიტიკა - 23:28, 27 Jan, 2019

1043

ამერიკის შეერთებული შტატების ელჩის მოვალეობის შემსრულებელმა როს უილსონმა „აჭარის ტელევიზიის“ ეთერში საქართველოში ჩატარებულ საპრეზიდენტო არჩევნებთან დაკავშირებით ისაუბრა და მომავალი არჩევნებისთვის ხელისუფლებას საარჩევნო სისტემის დახვეწა ურჩია.

"ეს იყო ძალიან საინტერესო პერიოდი, როცა შემეძლო ხელახლა გავცნობოდი საქართველოს. არჩევნები ეუთოს სადამკვირვებლო მისიამ შეაფასა, ასევე რამდენიმე ადგილობრივმა თუ საერთაშორისო ორგანიზაციამ, და ჩვენ მტკიცედ ვუჭერთ მხარს დაკვირვების შედეგებს, რომლებიც ამ ორგანიზაციებმა წარმოადგინეს. ეუთოს საბოლოო დასკვნა თებერვალში იქნება და მასში ხარვეზების აღმოფხვრის თაობაზე შევა რეკომენდაციები. ჩვენ ასევე ვიზიარებთ სხვა საერთაშორისო ორგანიზაციების რეკომენდაციებსაც საარჩევნო პროცესებთან დაკავშირებით. მოვუწოდებ და დაბეჯითებით ვურჩევ საქართველოს ხელისუფლებას, რომ გაითვალისწინოს ეს რეკომენდაციები, განიხილოს რა შეიძლება გაკეთდეს იმისათვის, რომ ამომრჩეველებს სამომავლოდ უფრო მეტი ნდობა ჰქონდეთ საარჩევნო სისტემის მიმართ, გაიხსნას სივრცე პოლიტიკური მრავალხმიანობისათვის. ეს ყოველივე ძალიან მნიშვნელოვანი იქნება საქართველოს დემოკრატიული განვითარებისათვის," - განაცხადა როს უილსონმა.

მისი თქმით, ეუთოს წინასწარი დასკვნა სხვადასხვა საკითხს და პრობლემას მოიცავდა და მათ შორის იყო ადმინისტრაციული რესურსის გამოყენება, სახელმწიფო გადამხდელთა რესურსების გამოყენება, ამომრჩეველთა დაშინების ფაქტები.

"ამ საკითხების მოგვარება და გადაწყვეტაა საჭირო, რადგან საარჩევნო სისტემისადმი ნდობა უაღესად მნიშვნელოვანია. და განსაკუთრებით მნიშვნელოვანია მაშინ, როცა საქართველო მიისწრაფის ევროკავშირისა და ნატოს ნაწილი გახდეს, წარმატებულ და დემოკრატიულ ქვეყნად ჩამოყალიბდეს," - აცხადებს აშშ-ის ელჩის მოვალეობის შემსრულებული.