მადლობა ღმერთს, რომ მათ წინააღმდეგ არ მითამაშია - ქართველ თავდამსხმელთა ინგლისელი მწვრთნელი CNN-ის სიუჟეტში

სპორტი - 22:06, 27 Jan, 2019

12369

47 წლის გრემ როუნტრიმ რაგბში თითქმის ყველაფერს მიაღწია როგორც მოთამაშემ და როგორც მწვრთნელმა. მის კარიერაში თითქმის აღარაფერი უნდა მომხდარიყო გასაოცარი, მაგრამ 4 თვის წინ მისი საქართველოს ნაკრების სამწვრთნელო შტაბში გადასვლა თავდამსხმელთა მწვრთელის პოსტზე საწინააღმდეგოს ამტკიცებს, - ასე იწყება CNN-ის სიუჟეტი "რატომ ფიქრობენ საქართველოში რაგბიზე მსოფლიოს ჩემპიონატის წინ".

თავად გრემი აცხადებს, რომ მას ქართველ თავდამსხმელებთან მუშაობა დიდ სიამოვნებას ანიჭებს.

საქართველოს ისედაც კარგი რეპუტაცია აქვს მაღალი დონის თავდამსხმელების აღზრდის საქმეში, მაგრამ როუნტრიც კი გაოცებულია მათი შესაძლებლობებით.

"ვერ ვიჯერებ, რა სიმძიმეების აწევა შეუძლიათ. არაფერი მინახავს მსგავსი აქამდე. რა წონაა! მათი დნმ-ი ალბათ, არაჩვეულებრივია. ვერც კი ვიჯერებ, რამდენად ძლიერები არიან ინდივიდუალურადაც და გუნდურადაც. მადლობა ღმერთს, რომ მათ წინააღმდეგ არასდროს მითამაშია," - აცხადებს იგი.

როუნტრი "ლელოსების" ძალას ადრეც იცნობდა. სწორედ ამან გადააწყვეტინა საქართველოში ჩასვლა და მათი დახმარება 2019 წლის ჩემპიონატის წინ.

"გულახდილად გეტყვით, როდესაც პირველად შევხვდი დავით ქუბრიაშვილს ოქტომბერში, თავი უხერხულად ვიგრძენი. მე მისი გულშემატკივარი ვიყავი საფრანგეთში. თავს პატარა ბავშვივით ვგრძნობდი, როცა ხელს ვართმევდი. მასთან მუშაობა განსაკუთრებული სიამოვნებაა. ამას გარდა, შერკინება და მოლი - მე აღფრთოვანებული ვარ როგორ მუშაობს ამ რგოლში საქართველო," - აცხადებს როუნტრი CNN-თან ინტერვიუში.