ზუგდიდში „დაიცავი საქართველოს“ წევრი კახა მიქაია დააკავეს. ამ წუთებში ის ზუგდიდის პოლიციაშია გადაყვანილი.

კახა მიქაია ზუგდიდის საქალაქო სასამართლოს წინ დააკავეს და ბრალად ადმინისტრაციულ სამართალდარღვევათა კოდექსის 173 მუხლის დარღვევა წაუყენეს, რაც პოლიციელის მოთხოვნისადმი დაუმორჩილებლობას გულისხმობს. ინფორმაცია "ნიუპოსტს" შსს-ს პრესსამსახურში დაუდასტურეს.

„ნიუპოსტის“ ინფორმაციით, მიქაია ზუგდიდში ბრიფინგს მართავდა და ქალაქის ცენტრში მდებარე ყოფილი რევაზ ლაღიძის ქუჩისთვის ძველი სახელის დაბრუნებას ითხოვდა. ორგანიზაციამ „დაიცავი საქართველო“ საგანგებო აბრებიც დაამზადა, სადაც ქუჩის სახელად ისევ რევაზ ლაღიძის სახელი და გვარია მითითებული. 

ორგანიზაციამ მანამდე გამგეობაში განცხადებაც შეიტანა, ხოლო მას შემდეგ, რაც პასუხი ვერ მიიღო, აბრები თვითნებურად დაამზადა და ისინი კახა მიქაიამ ქუჩის საცხოვრებელი სახლების ჭიშკრებზე ადგილობრივთა თანხმობით დაამონტაჟა. 

ეს ქუჩა ამჟამად გარდაცვლილი ზუგდიდელი პარლამენტის წევრის - გრიგოლ ქობალიას სახელობისაა.

ქუჩას პარლამენტის წევრისა და ზუგდიდში მრავალი ინოვაციის ავტორის, ტელეკომპანია „ოდიშის“ დამფუძნებლის გრიგოლ ქობალიას სახელი მისი გარდაცვალების შემდეგ, გამგეობის გადაწყვეტილებით მიენიჭა.