იუსტიციის უმაღლეს საბჭოში სხდომა მიმდინარეობს. სხდომის ფარგლებში საბჭოს თავმჯდომარის მოვალეობის შემსრულებელმა გიორგი მიქაუტაძემ განცხადება გააკეთა.

მისი განცხადებით, უკანასკნელი პერიოდის განმავლობაში სასამართლო სისტემის ირგვლივ განვითარებულ მოვლენებზე მნიშვნელოვანია იმსჯელოს მოსამართლეთა კონფერენციამ და საკუთარი პოზიცია დააფიქსიროს:

„არის მცდელობა მოხდეს იუსტიცის უმაღლესი საბჭოს ერთგვარი დასჯა მის მიერ საქართველოს კონსტიტუციის და „საერთო სასამართლოების შესახებ“ ორგანული კანონის სრული შესაბამისობით მიღებული გადაწყვეტილებების გამო.

მედიასაშუალებების გამოყენებით და სოციალური ქსელების მეშვეობით ყველაფერი კეთდება საზოგადოების შეცდომაში შესაყვანად, მაგალითად გავრცელდა ვიდეორგოლი თუ როგორ არჩევს უზენაესი სასამართლოს წევრს აშშ-ს სენატი.

ამისთვის ყველა სამართლებრივ საშუალებას გამოვიყენებთ. დღევანდელი მდგომარეობით სასამართლო კორპუსი არის ერთიანი და ძლიერი. სასამართლო სისტემა არის უპრეცენდენტოდ დამოუკიდებელი რაც განმტკიცებულია კონსტიტუციით და ორგანული კანონით. ჩვენ აუცილებლად მოვახდენთ საკანონმდებლო რეფორმების სწორ იმპლემენტაციას და დავასრულებთ როგორც მოსამართლეთა უვადოდ გადანიშვნის პროცესს, ასევე უზენაესი სასამართლოს მოსამართლეების ნომინირების პროცესს“, – განაცხადა გიორგი მიქაუტაძემ.