რუსეთის მიერ ოკუპირებული აფხაზეთის სავაჭრო-სამრეწველო პალატის დელეგაცია სლოვაკეთში გამართულ საერთაშორისო გამოფენა "ITF Slovakiatour 2019"-ში მონაწილეობს. ამის შესახებ ინფორმაციას აფხაზური მედია ავრცელებს. სავაჭრო პალატამ გამოფენაზე აფხაზური წარმოების პროდუქცია წარადგინა.

აღნიშნულის შესახენ საქართველოს საელჩო სლოვაკეთში განცხადებას ავრცელებს:

"2019 წლის 24-27 იანვარს ქ. ბრატისლავაში მდებარე საგამოფენო ცენტრ INCHEBA-ში მიმდინარე ტურისტულ გამოფენა ITF Slovakiatour 2019-სთან დაკავშირებით საელჩოს კომუნიკაცია ჰქონდა სლოვაკეთის საგარეო და ევროპულ საქმეთა სამინისტროსთან, სლოვაკეთის ტრანსპორტისა და მშენებლობის სამინისტროსთან, აგრეთვე უშუალოდ საგამოფენო ცენტრთან.

"სლოვაკეთის საგარეო და ევროპულ საქმეთა სამინისტროდან მიღებული ოფიციალური ნოტით, სლოვაკური მხარე კიდევ ერთხელ ადასტურებს საქართველოს სუვერენიტეტის, ტერიტორიული მთლიანობისა და საქართველოს ოკუპირებული რეგიონების არაღიარების პოლიტიკის მტკიცე მხარდაჭერას. სლოვაკეთის მხარე ხაზგასმით აღნიშნავს, რომ სლოვაკეთის მთავრობას არანაირი კავშირი არ აქვს ხსენებული გამოფენის ორგანიზებასთან. სლოვაკური მხარის თქმით, აღნიშნული გამოფენა არის კერძო კომპანიის მიერ ორგანიზებული კომერციული პროექტი, რომლის მფლობელიც არის ეროვნებით რუსი.

"სლოვაკეთის საგარეო და ევროპულ საქმეთა სამინისტროს განცხადებით, სლოვაკეთის მთავრობის არცერთი წარმომადგენელი ან ოფიციალური პირი არ ეწვევა ოკუპირებული აფხაზეთის რეგიონის ე.წ. „სავაჭრო-სამრეწველო პალატის“ წარმომადგენელთა სტენდს,“ - აღნიშნულია განცხადებაში.