მართლმსაჯულების სახლში მოსამართლეთა რიგგარეშე კონფერენცია იწყება. საგანგებო შეხვედრა, რომელზეც მოსამართლეები იკრიბებიან, იუსტიციის უმაღლეს საბჭოში გამართულ მოვლენებსა და მოსამართლეთა სიას უკავშირდება.

არსებული ინფორმაციით, შეხვედრაში მონაწილეები სწორედ არსებული დაპირისპირების შესახებ იმსჯელებენ. ნაზი ჯანეზაშვილი იმედს გამოთქვამს, რომ მოსამართლეები საზოგადოების ინტერესებს გაითვალისწინებენ და მის მხარეს დადგებიან:

„მოსამართლეებმა, როგორც ჩანს, გადაწყვიტეს, რომ ჩაეტარებინათ ეს კონფერენცია იმისთვის, რომ თქვან თავისი სიტყვა სასამართლოს ირგვლივ განვითარებულ მოვლენებზე და ეს არის ერთადერთი საკითხი დღის წესრიგში. დაველოდოთ, რას იტყვიან მოსამართლეები. მე მაქვს სურვილი, რომ ისინი დადგებიან ჩვენი მოქალაქეების მხარეს და კიდევ ერთხელ არ დაიცავენ ჩინჩალაძის კლანის ინტერესებს და თავად არ აღმოჩნდებიან, საბოლოო ჯამში, ამ ადამიანის ხელში,“ - განაცხადა ნაზი ჯანეზაშვილმა.