ფართომასშტაბიანი ფორუმი თბილისში - „რუსთავი 2“-ის ეგიდით მიმდინარე ფორუმზე პოლიტიკური პარტიების წარმომადგენლები, დიპკორპუსთან, მესამე სექტორსა და მედიასთან ერთად, 2018 წლის საპრეზიდენტო არჩევნებზე მსჯელობენ. შეხვედრაზე ასევე, განხილული იქნება სამომავლო ხედვები და გეგმები 2020 საპარლამენტო არჩევნებისთვის.

ფორუმში მონაწილეობას იღებენ გაერთიანებული ოპოზიციის „ძალა ერთოაბშიას“ ლიდერებიც. გრიგოლ ვაშაძემ „ნიუპოსტთან“ საუბრისას მსგავსი ფორუმების მნიშვნელობაზე ისაუბრა და აღნიშნა ორი ძირითადი კითხვა, რომელზეც ქვეყნის კეთილდღეობისთვის საჭიროა რომ პასუხები იქნეს გაცემული.

„უპირველეს ყოვლისა, მადლობა უნდა ვუთხრათ „რუსთავი 2“-ს ამ კონფერენციის ორგანიზაებისთვის, კიდევ უფრო ადრე უნდა გაგვეკეთებინა ასეთი კონფერენცია, შესანიშნავი წამოწყებაა, რადგანაც პოლიტიკური პარტიების, ჩვენი მოკავშირე ქვეყნების საელჩოების და არასამთავრობო ორგანიზაციების წარმომადგენლებს საშუალება მიეცათ, გულწრფელად ესაუბრათ იმაზე, როგორ ჩატარდა და რა შთაბეჭდილებები დაგვრჩა, რბილად რომ ვთქვათ, იმ უმსგავსობაზე, რასაც საპრეზიდენტო არჩევნების მეორე ტური დაარქვეს შემდგომ საქართველოში ხელისუფლების წარმომადგენლებმა, მაგრამ ეს იმდენად მნიშვნელოვანი არ არის, რამდენადაც ორი შეკითხვა:

პირველი - რა მოსდის საქართველოს დემოკრატიას, თუ საერთოდ შემოგვრჩა ჩვენ დემოკრატია? საით მივდივართ და როგორ აღმოვჩნდით ამ სიტუაციაში?

მეორე, კიდევ უფრო მნიშნელოვანი საკითხი - როგორ აისახება საქართველოს შიდა და საგარეო პოლიტიკაზე ის ხარვეზები და ნაკლოვანებები, რომელბიც ჩვენს სახელმწიფოებრიობას უკვე შეეპარა ძალიან სერიოზულად 2012 წლიდან?“, - განაცხადა გრიგოლ ვაშაძემ.