ტელეკომპანია „რუსთავი 2“-ის ეგიდით თბილისში ფართომასშტაბიანი ფორუმი ტარდება, რომელსაც ესწრებიან პოლიტიკური პარტიების, დიპლომატიური კორპუსისა და არასამთავრობო სექტორის, როგორც ადგილობრივი ასევე, საერთაშორისო დონის, წარმომადგენლები. შეხვედრის ფარგლებში იმსჯელებენ 2018 წლის საპრეზიდენტო არჩევნებზე და განიხილავენ გეგმებსა და ხედვებს 2020 არჩევნებისთვის.

საქართველოს მეოთხე პრეზიდენტის გიორგი მარგველაშილის ყოფილი მრჩევლის, ფიქრია ჩიხრაძის განცხადებით, ყველა ერთხმად თანხმდება, რომ საარჩევნო კოდექსში შესაბამისი ცვლილებები უნდა შევიდეს და მსჯელობაც სწორედ აღნიშნულ საკითხზე გაიმართება.

„ძალიან კარგია, რომ ჩავლილი არჩევნების შემდგომ, საზოგადოების მნიშვნელოვანი ნაწილი, ვისაც შეხება აქვს ან უშუალოდ, ან როგორც დამკვირვებელს, ის საზოგადოება იკრიბება და აჯამებს ჩავლილ არჩევნებს. ჩვენ მოვისმინეთ საერთაშორისო დამკვირვებლების შეფასებები, მოვისმინეთ ადგილობრივი ორგანიზაციების შეფასებები, ფრაგმენტული შეფასებები იყო პოლიტიკური პარტიების წარმომადგენლების მხრიდანაც, მაგრამ თავისთავად ასეთი, უფრო ფართო, შემაჯამებელი დისკუსია ძალიან მნიშვნელოვანია. რაც შეეხება სამომავლო გეგმებს, ყველა თანხმდება იმაზე, რომ მომავალ არჩევნებამდე საარჩევნო კანონმდებლობაში ცვლილებების განხორციელება არის ფუნდამენტურად მნიშვნელოვანი საკითხი, ვფიქრობ უპირველეს ყოვლისა ამ მიმართულებით გადაიდგმება ნაბიჯები“, - განაცხადა ფქირია ჩიხრაძემ.