100-ათასიანი პრემია - ჭიდაობის სფეროს წარმომადგენლები სკანდალურ ფაქტებს ასაჯაროვებენ

სპორტი - 12:41, 25 Jan, 2019

14727

ჭიდაობის ფედერაციის პრეზიდენტის წინააღმდეგ განცხადებებს მწვრთნელი ზურაბ შელია და თბილისის ჭიდაობის ფედერაციის გენერალური მდივანი გოჩა ჩორგოლიანიც აკეთებენ. ფედერაციაში არსებულ პრობლემებზე და დარღვევებზე მათ დღეს პრესკონფერენციაზე ისაუბრეს, რომელიც მოჭიდავე ზურაბ დათუნაშვილთან ერთად გამართეს. სწორედ ევროპის ჩემპიონი დათუნაშვილი ადანაშაულებს გეგა გეგეშიძეს მის მიმართ ფიზიკურ ძალადობაში და მისი თანამდებობიდან წასვლას ითხოვს.

მწვრთნელი ზურაბ შელია ფედერაციაში არსებულ ფინანსურ დარღვევებზე საუბრობს. შელია ამბობს, რომ ფედერაციის თანამშრომლებზე პრემიის სახით კოლოსალური თანხები გაიცემა.

„თვეც არ არის, 25 დღის მონაცემები მაქვს, სადაც 100 ათასი ლარი გაცემულია პრემიის სახით. გვარებს და სახელებს არ დავასახელებ, 26 ათას 974 ლარი დაერიცხა ფალავანთა კლუბის დირექტორს, რის გამო დაერიცხა, რა დამსახურება აქვს?,“- განაცხადა შელიამ.

თბილისის ჭიდაობის ფედერაციის გენერალური მდივანი გოჩა ჩორგოლიანის განცხადებით კი, გეგა გეგეშიძე ფედერაციის პრეზიდენტად არჩევნების გაყალბების გზით აირჩიეს.

„პრეზიდიუმი არის გაყალბებული, ყველაფერი თავიდან ბოლომდე არის ფარსი. პრეზიდენტის მაგივრად მივიღეთ იმპერატორზე უფრო დიდი უფლებების მქონე ადამიანი,“- აღნიშნა ჩორგოლიანმა.

ჭიდაობის ფედერაციის პრეზიდენტი გეგა გეგეშიძე სპორტის სასახლეში მომხდარ ფაქტთან დაკავშირებით 22 იანვარს დააკავეს და ბრალი ძალადობის მუხლით წაუყენეს. გეგა გეგეშიძეს მოსამართლემ 5000-ლარიანი გირაო შეუფარდა. ბრალდების მხარის მოთხოვნა, რომ ჭიდაობის ფედერაციის პრეზიდენტი თანამდებობიდან ჩამოეშორებინათ, სასამართლომ არ დააკმაყოფილა და ის ისევ ჭიდაობის ფედერაციის პრეზიდენტია.