თბილისში, სასტუმრო „რუმსში“ მრგვალი მაგიდა იმართება, რომელზეც განვლილ და მომავალ არჩევნებზე იმსჯელებენ. მასში მონაწილეობას იღებენ ქართველი პოლიტიკოსები, ადგილობრივი და საერთაშორისო გავლენიანი არასამთავრობო ორგანიზაციების ხელმძღვანელები.

მსჯელობის თემაა 2018 წლის საპრეზიდენტო არჩევნების შეჯამება - ნაკლოვანებები და საკანონმდებლო ხარვეზები, მიღებული გამოცდილება - დასკვნები და რეკომენდაციები, პოლიტიკური რეალობის ცვლილება: მზადება 2020 წლის არჩევნებისთვის.

კონფერენცია „რუსთავი 2“-ის ეგიდით იმართება. როგორც ტელეკომპანია „რუსთავი 2“-ის გენერალურმა დირექტორმა ნიკა გვარამიამ განაცხადა, მსგავსი კონფერენციის ჩატარება მნიშნელოვანია, რადგან მოხდეს ინფორმაციის გაცვლა და გაანალიზება.

„აქ იმყოფება მთელი პოლიტიკური სპექტრი, „ქართული ოცნების“ გარდა, საიდანაც მომხსენებლიც უნდა ყოფილიყო, მაგრამ არ მოვიდა. აქ იმყოფება მთელი არასამთავრობო სპექტრი, იმყოფებიან საერთაშორისო მასშტაბის არასამთავრობოები, არიან დიპლომატიური წარმომადგენლები, პრაქტიკულად ყველა, ჩვენ ჩავთვალეთ საჭიროდ, რომ ყოფილიყო მთელი მედიაც, შესაბამისად მედიის წარმომადგენლებიც არიან.

ჩვენთვის მნიშვნელოვანია ამ კონფერენციის ჩატარება, რომელიც პირველად იმართება მედიის ეგიდით, რომ გავიგოთ, როგორ გაანალიზეს 2018 წლის არჩევნები პოლიტიკურმა პარტიებმა და რას ფიქრობენ ისინი სამომავლოდ, ანუ 2018 წლის არჩევნების ჭრილში, როგორია მათი ხედვა 2019 და განსაკუთრებით 2020 არჩევნებისთვის. ეს გვინდა, რომ ერთმანეთსაც მოუყვნენ, არასამთავრობო და დიპლომატიურმა სექტორმაც გაიგოს და რაც მთავარია, მედიასთან მოხდეს კომუნიკაცია, რომ ვიყოთ მზად და ვიცოდეთ რა გველოდება პოლიტიკურ ცხოვრებაში. ყველაზე დიდი ფორუმია, რაც ჩატარებულა ამ თემაზე, რომლის მიზანიც არის მოხდეს კოორდინაცია და თემების გაცვლა-გამოცვლა“, - განაცხადა ნიკა გვარამიამ.