სასტუმრო „ბუდაპეშტის“ მშენებლობის თემაზე დედაქალაქის მერიაში სამოქალაქო სექტორთან შეხვედრა გაიმართა

პოლიტიკა - 09:37, 25 Jan, 2019

682

დედაქალაქის მერი კახა კალაძე, ვიცე-მერ ირაკლი ხმალაძესა და მერის მოადგილე მაია ბითაძესთან ერთად, სამოქალაქო სექტორის წარმომადგენლებს შეხვდა. ინფორმაციას ამის შესახებ მერია ავრცელებს

„შეხვედრაზე ვაკის პარკში სასტუმრო „ბუდაპეშტის“ მშენებლობის საკითხი განიხილეს და იმ სამართლებრივ ბერკეტებზე იმსჯელეს, რომელზე დაყრდნობითაც თბილისის მერია მეპატრონეს აღნიშნულ ტერიტორიაზე სასტუმროს მშენებლობის უფლებას არ მისცემს.

თბილისის მერმა შეხვედრის მონაწილეებს სასტუმროს მშენებლობის თემაზე დედაქალაქის მერიის პოზიცია პირადად გააცნო და აღნიშნა, რომ ვაკის პარკში მსგავსი მასშტაბის სასტუმროს მშენებლობას არ დაუშვებს.

კახა კალაძის განცხადებით, საკითხის კონსენსუსის გზით გადაჭრის მიზნით, მორიგ შეხვედრას სასტუმროს მეპატრონესთან დღეს გამართავს. უახლოეს მომავალში კი, აღნიშნულ საკითხთან დაკავშირებით, კონკრეტულ გადაწყვეტილებას მიიღებენ.

როგორც მერის მოადგილე მაია ბითაძემ შეხვედრის დასრულების შემდეგ განმარტა, საკითხის გადასაჭრელად დედაქალაქის მერია ისეთი იურიდიული ბერკეტების გამოყენებას გეგმავს, რომელიც, პირველ რიგში, საჯარო ინტერესს დაიცავს, თუმცა არც კერძო მესაკუთრის ინტერესს დააზარალებს.“- აღნიშნულია მერიის მიერ გავრცელებულ ინფორმაციაში.