ყარაბაღის ომის მონაწილის ძეგლი ახალქალაქში - აზერბაიჯანული მხარე საქართველოს ხელისუფლებას პასუხს სთხოვს და ფაქტს „ზურგში დანის ჩარტყმას“ უწოდებს

პოლიტიკა - 18:01, 24 Jan, 2019

2842

როგორც მოსალოდნელი იყო, ახალქალაქში ყარაბაღის ომის მონაწილისთვის ძეგლის გახსნამ აზერბაიჯანში დიდი ვნებათაღელვა გამოიწვია. გავრცელებული ინფორმაციით, საქმეზე განმარტება საქართველოს ელჩს აზერბაიჯანში უკვე მოსთხოვეს.

აზერბაიჯანული დიასპორის საინფორმაციო ცენტრის წარმომადგენელი, თოღრულ ალაჰვერდიევი აღნიშნავს, რომ მიხეილ ავაგიანი აზერბაიჯანელ ბავშვებსა და ქალებს დაუნდობლად ხოცავდა და ასეთ პიროვნებას დღეს საქართველოში ძეგლს უდგამენ.

თოღრულ ალაჰვერდიევისთვის გაუგებარია სტრატეგიული, პოლიტიკური და ისტორიული პარტნიორობის გათვალისწინებით, საქართველოს ხელისუფლებამ როგორ დაუშვა ავაგიანის ძეგლის აღმართვა.

„ჯავახეთში, ვისაც ძეგლი დაუდგეს, ის ყარაბაღის კონფლიქტში „კობრას“ სახელით იყო ცნობილი. აზერბაიჯანელ ბავშვებსა და ქალებს დაუნდობლად ხოცავდა და ასეთ პიროვნებას დღეს საქართველოში ძეგლს უდგამენ. ეს ყოვლად დაუშვებელია. ორი დღეა, არა მხოლოდ აზერბაიჯანში მცხოვრები ჩემი თანამემამულეები, არამედ მსოფლიოს სხვადასხვა ქვეყნაში მცხოვრები აზერბაიჯანელები შეძრა ამ ფაქტმა.

საქართველოს ხელისუფლების მხრიდან მეზობელი აზერბაიჯანის მიმართ ეს იყო ზურგში დანის ჩარტყმა.

ისევე როგორც საქართველოს, ასევე ჩვენი ტერიტორიები რეალურად რუსეთის მიერ არის ოკუპირებული. ჩვენ ერთი და იგივე ჭრილობა გვაქვს და არ მგონია, ქართველებს მოეწონოთ, რომ ჩვენ თქვენი სეპარატისტების ძეგლი დავდგათ აზერბაიჯანში,“- ამბობს თოღრულ ალაჰვერდიევი.

აზერბაიჯანის პარლამენტის დეპუტატი ამბობს, რომ ავაგიანი აფხაზეთის ომშიც მონაწილეობდა და ის აზერბაიჯანელების და ქართველების მტერი იყო.

„ვისაც ძეგლი დაუდგეს ყარაბაღში, უდანაშაულო ადამიანებს ხოცავდა. ამას გარდა, ის აფხაზეთის ომშიც მონაწილეობდა, ალბათ, ეს საქართველოს ხელისუფლებამაც კარგად იცის. საქართველო ჩვენი უახლოესი სტრატეგიული პარტნიორია, მეგობარი ქვეყანაა. მე როგორც აზერბაიჯანის მილი მეჯლისის წევრმა, მინდა ვთქვა, რომ ეს ფაქტი ძალიან გვაწუხებს და მოვითხოვთ, რომ მოკლე ვადაში ამ თემაზე პოზიცია გამოხატოს ხელისუფლებამ და რეაგირება მოახდინოს,“- აცხადებს ადილ ალიევი.

"ვისაც ძეგლი დაუდგეს ყარაბაღში ბავშვებს და ქალებს ხოცავდა... აფხაზეთის ომშიც მონაწილეობდა" - აზრბაიჯანული დიასპორა ქართულ მხარეს პასუხს სთხოვს