„ევროპული საქართველო“ მმართველი პოლიტიკური პარტიისგან განმარტებას ითხოვს - საქმე ეხება სამცხე-ჯავახეთში, ყარაბაღის ომის აქტიურ მონაწილისთვის ძეგლის დადგმასა და ღონისძეებაზე "ქართული ოცნების" დეპუტატის, ენზელ მკოიანის დასწრების ფაქტს.

ირაკლი კიკნაველიძე „ნიუპოსტთან“ ამბობს, რომ სოფელ ბუგაშენში მიხეილ ავაგიანისთვის ძეგლის დადგმა არასწორი, გაუთვლელი, გაუაზრებელი დაუფიქრებელი საქციელია.

"სამწუხაროდ, ჩვენს ორ მოძმე სახელმწიფოებს შორის ეს კონფლიქტი დიდი ხანია არსებობს. სახელმწიფოს პოზიცია ამ თემაზე ცნობილია. ჩვენ მხარს ვუჭერთ აზერბაიჯანის ტერიტორიულ მთლიანობას და ასევე ვემხრობით ამ კონფლიქტის მშვიდობიანად მოგვარებას. რაც შეეხება ძეგლის გახსნას, ეს არის არასწორი, გაუთვლელი, გაუაზრებელი დაუფიქრებელი საქციელი, მით უმეტეს, სამწუხაროა, რომ ამ შეხვედრას ესწრებოდა საქართველოს ხელისუფლების წარმომადგენელი. ამ შემთხვევაში აქ სახელსა და გვარს მნიშვნელობა არ აქვს. ენზელ მკოიანის სახელს სხვა კონტექსტში აქვს მნიშვნელობა. მნიშვნელოვანია, რომ ძეგლის გახსნას საქართველოს ხელისუფლების წარმომადგენელი დაესწრო. ზოგადად, რაც შეეხება ენზელ მკოიანს, ეს არის ძალიან საშიში მოვლენა ქართული სახელმწიფოსთვის. მას პრაქტიკულად არ ეხება მართლმსაჯულება, უნდა გავიხსენოთ მის მიერ ორგანიზებული დანაშაულებები, მათ შორის ახალქალაქში. შესაბამისად, "ქართულ ოცნებას" მოუწევს ამ თემაზე განმარტებების გაკეთება, რადგან ეს საკითხი ხელწამოსაკრავი თემა არ არის, რადგან ჩვენი სახელმწიფოსთვის რთული და მნიშვნელოვანი თემაა. ამიტომ მმართველმა პარტიამ უნდა განმარტოს, რატომ მოხდა ეს ყველაფერი და რატომ ესწრებოდნენ მათი წარმომადგენლები ამ ღონისძიებას"- აცხადებს კიკნაველიძე.