"ქართული ოცნების" წევრი, გედევან ფოფხაძე, ამბობს, რომ "ჩინჩალაძისა და მურუსიძის კლანის მხარდაჭერა იქნება ღალატი".

ფოფხაძემ ჟურნალისტებთან კომენტარი როსტომ მეფის სასახლეში შესვლამდე გააკეთა და თქვა, რომ სხდომაზე საკუთარი პოზიციის დასაცავად მივიდა და არსაიდან აპირებს წასვლას.

„ჩემი გუნდი არის ადამიანთა ერთობა, რომლებთან ერთადაც ვიბრძოდით. ამ ხალხისთვის ნამდვილად არ მიღალატია. მგონი, ჩინჩალაძე-მურუსიძის კლანის მხარდაჭერით გავხდები ამ ადამიანების მოღალატე. ვფიქრობ, ჩემი გუნდის, ხალხის და ქვეყნის ერთგული ვიქნები იმით, რომ პრინციპულად დავიცავ პოზიციას, რომელიც სწორია. არსაიდან წასვლას არ ვაპირებ. მაქვს ჩემი პოზიცია, მოვედი ამ პოზიციის დასაცავად... ჩვენ, ვისაც მიგვაჩნია, რომ სასამართლოში ღირსეული ადამიანების დამკვიდრებით ყველაზე დიდ სიკეთეს ვუკეთებთ ჩვენს ქვეყანას, არსაიდან არ გვაქვს გასაქცევი“, - ამბობს ფოფხაძე.

დეპუტატი არ ელის, რომ დღეს მისი ან სხვა ე.წ. ამბოხებული დეპუტატების გარიცხვის საკითხი დადგება.

„თუ შეიცვლება დღის წესრიგი არ ვიცი... სხვა თემებზე აქცენტების გადატანა იქნება არასწორი, გვაქვს ერთი კონკრეტული მიზანი, ღირსეული ადამიანები მოხვდნენ უზენაეს სასამართლოში და ამ მიზნის ირგვლივ უნდა გაერთიანდეს ყველა.

კონფლიქტი არავის ინტერესში არ არის და საზოგადოებაში ერთგვარი კონსენსუსი ამ თემასთან დაკავშირებით არსებობს. ამ გადაწყვეტილებას ალტერნატივა არ აქვს, უზენაეს სასამართლოში წარმოდგენილი უნდა იყვნენ ღირსეული ადამიანები, არ შეიძლება სხვა მიმართულებით წავიდეთ,“-თქვა მან.