ეკა ბესელია როსტომ მეფის სასახლეში მივიდა - რას ამბობს დეპუტატი უმრავლეოსბიდან შესაძლო გარიცხვაზე

პოლიტიკა - 11:07, 24 Jan, 2019

1284

განხეთქილება "ქართულ ოცნებაში" - როსტომ მეფის სასახლეში, სადაც ბიძინა ივანიშვილი მმართველი პარტიის წევრებს ხვდება, დაპირისპირების ერთ-ერთი ფიგურანტი, ეკა ბესელიაც მივიდა.

უმრავლესობის დეპუტატმა ჟურნალისტებთან კომენტარი გააკეთა და თანაგუნდელებს პარტიულ და სახელმწიფოებრივ საკითხებს შორის განსხვავების დანახვას ურჩია.

დეპუტატის თქმით, ის დღევანდელი შეხვედრიდან ელოდება, რომ სხდომაზე საგნობრივი, შინაარსობრივი და არგუმენტირებული მსჯელობა გაიმართება.

„ამ სხდომისთვის ჩამოვედი ამ დილით და მაქვს ძალიან საქმიანი განწყობა და ძალიან მინდა და მაქვს ასეთი მოლოდინი, რომ უმრავლესობის შეხვედრა, რომელიც პირველია უმრავლესობის ამ ფორმატში დეკემბრის ბოლო კვირის შემდეგ, გაიმართოს საგნობრივი, შინაარსობრივი და არგუმენტებით მსჯელობა. ძალიან მნიშვნელოვან და სახელმწიფოებრივ საკითხზე, როგორიც არის უზენაესი სასამართლოს მოსამართლეების არჩევა და სასამართლოს რეფორმირების საკითხი.

მე ვარ მზად იმისთვის, რომ ჩემი პოზიციები, რომელიც არის ძალიან პრინციპული, გავუზიარო ჩემს კოლეგებს და ვუთხრა არგუმენტები, რატომ, მაქვს ეს პოზიცია და რატომ მიმაჩნია, რომ არ შეიძლება იმ სიის მხარდაჭერა, რაც იყო წარმოდგენილი და რატომ არ შეიძლებოდა ნაჩქარევად ამ საკითხის განხილვა და რა უნდა გაკეთდეს მომავალში. მაქვს მე მგონი ძალიან მყარი არგუმენტები. მე იმედი მაქვს, რომ ასეთი შეხვედრა იქნება დღეს, არგუმენტებით საუბარი და მინდა დავიტოვო ასევე იმის იმედიც, რომ შევჯერდებით საერთო ხედვაზე და პოზიციაზე,“- განაცხადა ბესელიამ.

ჟურნალისტები დაინტერესდნენ, როგორი მოლიდინი აქვს დეპუტატს, გარიცხავენ თუ არა მას პარტიიდან, რაზეც ეკა ბესელიამ თქვა, რომ საკითხზე არ ფიქრობს.

„მე ძალიან ვწუხვარ, რომ ყველაზე ხშირად ეს კითხვა ისმება ხოლმე თქვენგან. იმიტომ, რომ თუ რაიმეს ადგილი ჩემს გონებაში არ არის და რაიმეზე არ ვფიქრობ საერთოდ, ეს არის ერთადერთი ეს საკითხი და ასეთ არასერიოზულ საკითხებზე არ მაქვს არც დრო და არც გონებაში ადგილი, რომ ამით დავკავდე. ამიტომ, ამაზე ნუღარ ვისაუბრებთ. რაც შეეხება გუნდურობას, შიდა საკითხებს, ამაზეც ძალიან მყარი პოზიციები მაქვს და არგუმენტები მაქვს. მე არ ვარ ის ადამიანი, რომელსაც ესწავლება გუნდის მხარდაჭერა, შეხიდება, მაგრამ კიდევ ერთხელ ვამბობ, რომ ვასხვავებ და მიმაჩნია, რომ ჩვენ ყველამ უნდა დავინახოთ განსხვავება სახელმწიფოებრივ საკითხსა და შიდა პარტიულ ურთიერთობას შორის. ეს ცოტა სხვადასხვა რამეა.

„მთავარი კითხვა რა არის, მე წავალ უმრავლესობიდან თუ რა ეშველება სასამართლო სისტემას, რომელია მთავარი კითხვა? ჩემთვის გულწრფელად გეუბნებით, მთავარი კითხვა არის ჩვენი ქვეყნისთვის, ჩვენი მომავლისთვის, ჩვენი შვილების მომავლისთვის ჩვენ შევძლებთ დავტოვოთ ქვეყანაში გამართული მართლმსაჯულება თუ არა. მე სად ვიქნები, ეს მეორე ხარისხის, მეათ ხარისხის კითხვა,“-განაცხადა ეკა ბესელიამ.