"დაპირისპირებულ მხარეებს მოვუწოდებთ, დაელოდონ გამოძიების შედეგებს" - მიხეილ ბატიაშვილი ჭიდაობის ფედერაციაში მიმდინარე მოვლენებზე

პოლიტიკა - 13:47, 23 Jan, 2019

736

ჭიდაობის ფედერაციის პრეზიდენტის დაკავებას, განათლების, მეცნიერების, კულტურისა და სპორტის მინისტრი გამოეხმაურა. მიხეილ ბატიაშვილის თქმით, საგამოძიებო მოქმედებები მშვიდ ვითარებაში უნდა დასრულდეს, შემდეგ კი ყველა მხარემ კონფლიქტის სწრაფად აღმოფხვრაზე უნდა იზრუნოს.

„ყველა მხარე, რომელიც დაინტერესებული ვართ, რომ ქართული სპორტი განვითარდეს, ამ პროცესში აქტიურად ვართ ჩართულები. პირველ რიგში საგამოძიებო მოქმედებები მშვიდ ვითარებაში უნდა დასრულდეს. შემდეგ ყველა მხარე უნდა დავსხდეთ და ვისაუბროთ, რომ რაც შეიძლება სწრაფად აღმოიფხვრას ეს კონფლიქტი. ყველა მხარე, ვისაც სპორტის განვითარება გვაინტერესებს, ყველაფერს გავაკეთებთ იმისთვის, რომ ეს კონფლიქტი რაც შეიძლება, სწრაფად გადაიჭრას.“- აღნიშნა ბატიაშვილმა.

სპორტის მინისტრმა საპროტესტო აქციაზე გამოსულ მოჭიდავეებს სიმშვიდისკენ მოუწოდა და განაცხადა, რომ გამოძიების შედეგებს უნდა დაელოდონ:

„ვგმობთ ყოველგვარ ძალადობას, ამასთან დაპირისპირებულ მხარეებს მოვუწოდებთ, დაელოდონ გამოძიების შედეგებს და სასამართლოს გადაწყვეტილებას. ასევე, ვთხოვთ იმ მოჭიდავეებს, რომლებმაც დატოვეს მოსამზადებელი შეკრება და შეწყვიტეს სავარჯიშო პროცესი, დაუბრუნდნენ დარბაზებს და გააგრძელონ საწვრთნელი პროცესი. ქართველი გულშემატკივარი, მათგან საერთაშორისო სარბიელზე წარმატებულ ასპარეზობას ელოდება, რაშიც ჩვენ ყველანაირად ხელს შევუწყობთ.” – განაცხადა მიხეილ ბატიაშვილმა.