სკანდალი ჭიდაობის ფედერაციაში - შოთა ხაბარელი პასუხისმგებლობას სპორტის სამინისტროს აკისრებს

პოლიტიკა - 13:24, 23 Jan, 2019

1059

პარლამენტის სპორტისა და ახალგაზრდულ საქმეთა კომიტეტის თავმჯდომარის პირველმა მოადგილე, შოთა ხაბარელი თბილისში 11 იანვარს მომხდარ დაპირისპირებაზე პასუხისმგებლობას განათლების, მეცნიერების, კულტურისა და სპორტის სამინისტროს აკისრებს.

„ძალადობა მიუღებელია ნებისმიერ სფეროში და მით უმეტეს სპორტში. ყველამ ნახა თუ რა პროცესები განვითარდა ჭიდაობის მიმართულებით. ვფიქრობ, რომ აქ არის სიღრმისეულად შესასწავლი ეს თემა. ყველამ იცის, რომ მიმდინარეობს გამოძიება. საკითხი, რომელიც არის კონკრეტულ შემთხვევაში გამწვავებული, ეს არ უნდა მოხდეს გადაგორებით და ყველა თემა თავიდან ბოლომდე უნდა იყოს შესწავლილი. სამინისტრომ, გარკვეულწილად, თავისი აზრი უნდა დააფიქსიროს და შედეგი უნდა დადოს, მაგრამ შედეგს ჩვენ ვერ ვხედავთ, სამწუხაროდ. თვითონ სამინისტრომ უნდა შეიმუშავოს ისეთი პოლიტიკა, რომელიც აი, ასეთ ფაქტებს აგვაცილებს თავიდან. გაკრვეულწილად, მე ვფიქრობ, რომ მთელი სიმძიმე უნდა მოხდეს სამინისტროს მხრიდან და ყველაფერს თავის სახელი უნდა დაერქვას,“ -განაცხადა შოთა ხაბარელმა.

შეგახსენებთ, რომ ბერძნულ-რომაული სტილით მოჭიდავე ზურაბ დათუნაშვილმა ფეისბუქში განცხადება გაავრცელა, სადაც აღნიშნავს, რომ 11 იანვარს საქართველოს ჩემპიონატზე მას თავში რკინის ბლაგვი საგანი ჩაარტყა საქართველოს ჭიდაობის ფედერაციის პრეზიდენტმა გეგა გეგეშიძემ.

მოგვიანებთ კი მედიაში სკანდალური ვიდეო გამოქვეყნდდა. კადრებში ჩანს, რომ ჩოჩქოლის დროს ფედერაციის პრეზიდენტი, გეგა გეგეშიძე, ევროპის ორგზის ჩემპიონს ზურაბ დათუნაშვილს ჯაჭვით ხელში უახლოვდება, რომელსაც ზურა დათუნაშვილის მიმართულებით იქნევს. სპორტსმენს ჯერ ჯაჭვი, შემდეგ კი მუშტი სახეში ხვდება.