საქართველოს პრემიერ-მინისტრის მამუკა ბახტაძის მიერ 29 აგვისტოს მიღებული დადგენილების მიხედვით, რაიონებს სატრანსპორტო შესყიდვების ჩატარების შესაძლებლობა ჩამოერთვათ, სახელმწიფო შესყიდვების სააგენტოს მიერ გამოცხადებული კონსოლიდირებული ტენდერი კი, არ შედგა. ამის შესახებ „ევროპული საქართველოს“ ერთ-ერთმა ლიდერმა გიგი უგულავამ დღეს გამართულ ბრიფინგზე განაცხადა:

„სახელმწიფო შესყიდვების სააგენტოს მიერ 28 დეკემბერს გამოცხადებული კონსოლიდირებული ტენდერი სკოლის მოსწავლეების სატრანსპორტო მომსახურების შესახებ არ შედგა. ფაქტი ცხადყოფს, რომ საქმე გვაქვს სახელმწიფო უწყებების მხრიდან გულგრილ და უპასუხისმგებლო დამოკიდებულებასთან. 15 იანვარს სასწავლო პროცესის განახლების თარიღი ყველასთვის ცხადი იყო და წარმოუდგენელია, აღნიშნული ტენდერი ჩატარებულიყო 28 დეკემბერს. 10 იანვარს ჩაშლილი ტენდერის შემდეგ რაიონის მერებმა 21 იანვარს, სასწავლო პროცესის განახლების დღეს დაიწყეს გამარტივებული შესყიდვების განხორციელებისთვის საჭირო დოკუმენტაციის წარმოება, რაც მიანიშნებს, რომ პრობლემა რაიონების უმრავლესობაში კვლავ მოუგვარებელი დარჩება”,-განაცხადა გიგი უგულავამ.

გიგი უგულავას ინფორმაციით, 21 იანვარს საქართველოს 36 რაიონის 100-ზე მეტი სკოლის ათასობით მოსწავლე სატრანსპორტო მომსახურების გარეშე დარჩა და ათობით კილომეტრის გავლა სკოლამდე ფეხით მოუწია.