საქართველოდან თავშესაფრის მაძიებლების რიცხვი შვედეთში გაიზარდა

საქართველოდან თავშესაფრის მაძიებლების რიცხვი შვედეთში გაიზარდა - შვედეთის ელჩი

პოლიტიკა - 10:42, 23 Jan, 2019

1139

შვედეთის ელჩი ადასტურებს, რომ საქართველოდან თავშესაფრის მაძიებლების რიცხვი შვედეთში 2018 წელს გაიზარდა. "კურიერის" კითხვებზე წერილობითი პასუხის დროს ულრიკ ტიდე-სტრომი აცხადებს, რომ შვედეთში ძარცვის დიდი ნაწილი ჩადენილია სხვა ქვეყნებიდან, მათ შორის საქართველოდან ჩასული ადამიანების მიერ.

ელჩის აზრით, ეს ფაქტი არ ნიშნავს იმას, რომ ყველა ქართველი თავშესაფრის მაძიებელი დანაშაულებრივ საქმიანობაშია ჩართული.

"2018 წელს საქართველოს მოქალაქეები იყვნენ რაოდენობით მე-4 ადგილზე იმ ქვეყნის წარმომადგენლებს შორის, რომლებმაც თავშესაფრის მოთხოვნით შვედეთს მიმართეს 1156 განაცხადით. თითქმის, ყველა მიმართვა უსაფუძვლოდ იყო მიჩნეული. დადებითი პასუხის მაჩვენებელი, თითქმის, 0%-ია. მართალია, შვედეთში ძარცვის დიდი ნაწილი ჩადენილია სხვა ქვეყნებიდან, მათ შორის საქართველოდან ჩასული პირების მიერ, თუმცა ეს არ ნიშნავს იმას, რომ ყველა ქართველი თავშესაფრის მაძიებელი დანაშაულებრივ საქმიანობაშია ჩართული. დიალოგი და თანამშრომლობა შვედეთისა და საქართველოს ხელისუფლებებს შორის კარგად მუშაობს და მომავალში გაძლიერდება. ძალისხმევა გაიზრდება უვიზო რეჟიმის ბოროტად გამოყენების წინააღმდეგ ბრძოლაშიც. ვიზალიბერალიზაციის შემოღება არის დიდი მიღწევა, რომელიც ასევე მოვალეობებს გულისხმობს და მისი დაცვა ჩვენს საერთო ინტერესებშია," ამბობს ელჩი "კურიერის" კითხვაზე წერილობითი პასუხისას.