უზენაესი სასამართლოს მოსამართლეობის კანდიდატებმა პარლამენტს თვიტაცილების შესახებ განცხადებით მიმართეს. აღნიშნულს საქართველოს პრემიერ-მინისტრი მამუკაბახტაძე ლიეტუვაში, ქართველ ჟურნალისტებთან საუბრისას გამოეხმაურა.

ბახტაძის თქმით, საქართველოში დამთავრდა დრო, როდესაც მთავრობა, პრემიერ-მინისტრი ან მტავრობის რომელიმე მაღალჩინოსანი სასამართლოებში მოსამართლეების შერჩევას ახდენდა:

„ჩვენი პოლიტიკურ გუნდის პოზიცია არის ძალიან ნათელი, რომ აუცილებად უნდა დადგინდეს ის კრიტერიუმები და პროცედურები, რითაც მოხდება მოსამართლეების წარდგენა. რაც შეეხება მთავრობის ჩართულობას, ამაზე არაერთხელ გავაკეთე ძალიან პირდაპირი განცხადება, საქართველოში დამთავრდა ის დრო, როდესაც მთავრობა, პრემიერ-მინისტრი ან მთავრობის რომელიმე მაღალჩინოსანი ახდენდა სასამართლოებში მოსამართლეების შერჩევას ან სასამართლოს ერთგვარ დალაგებას, ასეთი რაღაც საქართველოში აღარ მოხდება. სასამართლო არის დამოუკიდებელი შტო, მაგრამ ამასთან ერთად საზოგადოებას და თითოეულ ჩვენგანს უნდა ჰქონდეს განცდა, რომ არსებობს ობიექტური პროცედურები და კრიტერიუმები. ეს არის ჩვენი პოლიტიკური გუნდის პოზიცია და საზოგადოებასთან ამის შესახებ ჩვენ გვაქვს ძალიან პირდაპირი დიალოგი“, – განაცხადა მამუკა ბახტაძემ.