უზენაესი სასამართლოს მოსამართლეობის ათივე კანდიდატმა დღეს უმაღლეს საკანონმდებლო ორგანოს მიმართა და მათ თვითაცილება მოითხოვეს. არსებულ ვითარებას ოპოზიციის რიგებში ეხმაურებიან.

მოსამართლეობის კანდიდატების განცხადება მისაღებია პარლამენტის იურიდიული კომიტეტის თავმჯდომარის მოვალეობის შემსრულებლისთვის დავით მათიკაშვილისთვის:

„მიუხედავად იმისა, რომ თავდაპირველად აქ არ იყო არანაირი სამართლებრივი დარღვევა სიის წარმოდგენისა, საზოგადოების მაჯისცემას ადეკვატურად შეხვდა როგორც იუსტიციის უმაღლესი საბჭო. სწორედ აქედან გამომდინარე, იქნა ძალიან მნიშვნელოვანი გადაწყვეტილება მიღებული თვითონ ამ მოსამართლეთა კანდიდატების მხრიდანაც, ეს სათანადოდ უნდა იყოს ადეკვატურად შეფასებული და აღქმული და პარლამენტმაც, ცხადია, შესაბამისი შემხვედრი ნაბიჯით განსაზღვრა, რომ დავადგენთ აუცილებლად კრიტერიუმებს და შემდეგ მოხდება უკვე ახალი სიის ფორმირება,“ - განაცხადა დავით მათიკაშვილმა.