"დროებით უკან დახევა" - მესამე სექტორი მოსამართლეთა თვითაცილებას აფასებენ

პოლიტიკა - 17:42, 21 Jan, 2019

803

არასამთავრობო ორგანიზაციების წარმომადგენლები უზენაესი სასამართლოს მოსამართლეობის კანდიდატების მიერ თვითაცილების მოთხოვნას აფასებენ.

მათი თქმით, ახლა მნიშვნელოვანია, რომ ახალი კრიტერიუმები შემუშავდეს და კლანური მმართველობის მსურველებს არ მიეცეთ, უვადოდ გამწესების შესაძლებლობა.

„საქართველოს დემოკრატიული ინიციატივას“ თავმჯდომარე გიორგი მშვენიერაძე მოსამართლეთა განცხადებას უკან დახევას უწოდებს.

„ამ გადაწყვეტილების მიზანი არის უკან დახევა დროებით, რომ შემდგომ, საბოლოოდ მაინც კლანმა მოახერხოს უზენაეს სასამართლოში თანამდებობის დაკავება, ამიტომ, ჩვენი ბრძოლა ამით არ დასრულებულა, ბუნებრივია. ჩვენი ბრძოლა არის იმისკენ, რომ საქართველოს პარლამენტში, ისევე როგორც იუსტიციის უმაღლეს საბჭოში არსებობდეს ნათელი და ცხადი პროცედურები, რომლითაც შეირჩევა კანონით გაწერილი კრიტერიუმების შესაბამისი კანდიდატები,“ - ამბობს მშვენიერაძე.

„საერთაშორისო გამჭვირვალობა - საქართველოს“ აღმასრულებელი დირექტორი, ეკა გიგაური სრული მობილიზების აუცილებლობაზე ამახვილებს ყურადღებას, რათა თავიდან აიცილონ სასამართლოში კლანური მმართველობა.

„ეს არ არის დიდი გამარჯვება, ეს არის მხოლოდ ერთი ნაბიჯი გამარჯვების მიმართულებით გადადგმული. დღეს მნიშვნელოვანია, რომ მაქსიმალურად ყველა ჯგუფის მობილიზაცია მოხდეს იმისთვის, რომ ის კლანი, რომელიც სასამართლოშია, მან აღარ ითარეშოს სასამართლოში და მათ დატოვონ თავიანთი თანამდებობა,“ - განაცხადა ეკა გიგაურმა.