სპორტის სასახლეში 11 იანვარს მომხდარ დაპირისპირებას „ევროპულ საქართველოს" ერთ-ერთი ლიდერი, სერგო რატიანი ეხმაურება.

დეპუტატი ჭიდაობის ფედერაციის პრეზიდენტის მხრიდან ზურაბ დათუნაშვილზე განხორციელებულ თავდასხმას კორცხელის ინციდენტს უკავშირებს, რადგან მისი თქმით, თავის დროზე ინციდენტში მონაწილე პირებმა დანაშაულზე პასუხი არ აგეს.

მისი შეფასებით, „ქართული ოცნება“ პოლიტიკური ზონდერებით მუშაობს.

„ქართული ოცნების ხელისუფლებას ჰყავს ფასიანი ზონდერები, რომლებიც სხვადასხვა ფედერაციასა და სსიპ-ებში არიან მოთავსებულები. ის, რაც ჩვენ ამ შემთხვევაში ვნახეთ, ეს იყო საჩვენებელი სადამსჯელო ღონისძიება და ეს ადამიანები იმდენად დარწმუნებულები არიან დაუსჯელობაში, რომ შეუძლიათ, თავს უფლება მისცენ, რომ ამდენი ადამიანის თანდასწრებით ჩაიდინონ კრიმინალი,“ - განაცხადა სერგო რატიანმა.