იუსტიციის უმაღლესი საბჭოს შენობასთან შეკრებილმა არასამთავრობო ორგანიზაციების წარმომადგენლებმა, სხვადასხვა საზოგადოებრივი ჯგუფებმა და ადვოკატებმა დემონსტრაციულად მოაწერეს ხელი სპეციალურ მანიფესტს, რომლითაც იუსტიციის უმაღლესი საბჭოს იმ 11 წევრის გადადგომას ითხოვენ, ვინც უზენაეს სასამართლოში გასამწესებელი მოსამართლეების ათკაციან სიას მხარი დაუჭირა.

„იუსტიციის უმაღლესი საბჭოს იმ შემადგენლობამ, რომელმაც მხარი დაუჭირეს გასული წლის დეკემბერში მოსამართლეების სიის ნომინირებას საქართველოს პარლამენტში, უნდა დატოვონ თანამდებობები. მეორე - სასამართლო სისტემა უნდა დატოვონ ბატონმა მურუსიძემ და ბატონმა ჩინჩალაძემ, ვინაიდან ისინი არიან სიმბოლო მორჩილი მოსამართლეების, ასევე, აუცილებელია, რომ პარლამენტმა ფართო დისკუსიებით დაიწყოს მსჯელობა კრიტერიუმებსა და პროცედურებზე და მეოთხე, ასევე მნიშვნელოვანი მოთხოვნა, რომელიც აუცილებლად მიგვაჩნია ჩვენ - სიის ნომინირება მოხდეს მაშინ, როცა იუსტიციის უმაღლესი საბჭოს შემადგენლობა განახლდება,“-აცხადებს საიას ხელმძღვანელი სულხან სალაძე.

”საერთაშორისო გამჭვირვალობა - საქართველოს” აღმასრულებელი დირექტორის ეკა გიგაურის განცხადებით, იუსტიციის უმაღლეს საბჭოში რჩება დაახლოებით 20 ისეთი მოსამართლე , რომლებიც ცნობილი არიან, როგორც ხელისუფლების ნების გამტარებელი პირები.

„ეს ადამიანები გამოიყენებოდნენ იმიტომ, რომ ინსტრუქციები შეესრულებინათ. დღეს ვხედავთ, რომ ეს ადამიანები უფრო მეტად არიან გაძლიერებული, მათ აქვთ უფრო მეტი ძალაუფლება და მათ შეუძლიათ მთელ პარლამენტს ინსტრუქციები მისცენ, ვინ აირჩიონ, როგორ აირჩიონ და საერთოდ რა გააკეთონ სასამართლოსთან მიმართებაში“-აცხადებს ეკა გიგაური.