ევროპის ჩემპიონის ცემის სკანდალი - ვეტერანი სპორტსმენები გეგეშიძის ქმედებას სამარცხვინოს უწოდებენ და საკითხის შესწავლას ითხოვენ

პოლიტიკა - 12:41, 20 Jan, 2019

4864

სკანდალი ჭიდაობის ფედერაციაში - ფედერაციის პრეზიდენტის მიერ ევროპის ჩემპტიონის ცემის ფაქტს, ეხმაურებიან ვეტერანი სპორტსმენები. საქართველოს ეროვნული ოლიმპიური კომიტეტის პრეზიდენტი, ლერი ხაბელოვი ამბობს, რომ მსგავსი ფაქტები დაუშვებელია და ფედერაციის პრეზიდენტებს თმენის განსაკუთრებული ვალდებულება უნდა ჰქონდეთ.

„თუ ეგეთი ფაქტი მოხდა, რა თქმა უნდა, არასასიამოვნოა და, რა თქმა უნდა, ეგეთი საკითხები როცა დგას, საზოგადოება სხვანაირად უყურებს ამ ყველაფერს. როდესაც პრეზიდენტი ხარ, თმენის უნარი მეტი უნდა გქონდეს. უნდა შეიკრიბოს აღმასკომი და ეს საკითხი განიხილოს. ჯერ საზოგადოებამ უნდა განიხილოს, პირველ რიგში, მე ესე ვფიქრობ და სწორი იქნება. თუ რამე ისეთი არის დანაშაულის ფაქტები, ეგ უკვე მეორე ნაწილია,“ - განაცხადა საქართველოს ეროვნული ოლიმპიური კომიტეტის პრეზიდენტმა, ლერი ხაბელოვმა.

მომხდარს ეხმაურება ლეგენდარული ქართველი მოჭიდავე, საქართველოს ჭიდაობის ფედერაციის პრეზიდიუმის წევრი, მსოფლიოს ორგზის ჩემპიონი, გურამ საღარაძე, რომელიც ცემის ფაქტს მიუღებელს და სამარცხვინოს უწოდებს.

„გული მწყდება... ეს ეხება ფედერაციის პრეზიდენტს ხომ? ეს უნდა იყოს მაგალითი ყველა ჩვენგანისთვის, დიდისთვის თუ პატარისთვის. ზრდილობის, სიკეთის, სიყვარულის, მეგობრობის და ერთ გუნდად შეკვრის და თანადგომის. ესეთი რამეები არ შეიძლება, ყოვლად მიუღებელია. ამ საკითხზე პრეზიდიუმმა სერიოზულად უნდა იმსჯელოს,“ - აღნიშნავს საღარაძე.

სპორტის სასახლეში გადაჭებული ექსკლიზიური კადრები "შაბათის კურიერმა" გასააჯაროვა. მასალა თვითმხილველის მიერაა გადაღებული.

სკანდალურ კადრებში ჩანს, რომ ჩოჩქოლის დროს ფედერაციის პრეზიდენტი, გეგა გეგეშიძე, ევროპის ორგზის ჩემპიონს ჯაჭვით ხელში უახლოვდება და მას ზურა დათუნაშვილის მიმართულებით იქნევს. სპორტსმენს ჯერ ჯაჭვი, შემდეგ კი სახეში მუშტი ხვდება.

სპორტის სასახლეში მომხდარ დაპირისპირებასთან დაკავშირებით შინაგან საქმეთა სამინისტრომ გამოძიება ძალადობის მუხლით დაიწყო. უწყების ცნობით, კონფლიქტში მონაწილე პირების ვინაობა დადგენილია. შსს-ს ინფორმაციით, კონფლიქტში მონაწილე მხარეები გამოსაკითხად დაიბარეს, თუმცა, მათ ინფორმაციის ნებაყოფლობით მიწოდებაზე უარი თქვეს. სწორედ ამის გამო, მათი გამოკითხვა სასამართლო წესით მოხდება.