"მდგრადობაზე და ზარალზე ოფიციალური დასკვნა რამდენიმე დღეში გვექნება"- საბურთალოს რაიონის გამგებელი დიდ დიღომში აფეთქებულ კორპუსზე

პოლიტიკა - 19:41, 19 Jan, 2019

914

საბურთალოს რაიონის გამგებლის გაიოზ ვასაძის თქმით, დიდ დიღომში აფეთქების შედეგად დაზიანებული საცხოვრებელი კორპუსის მდგრადობასთან დაკავშირებით ექსპერტიზის დასკვნის პასუხი რამდენიმე დღეში გახდება ცნობილი და ამის შემდეგ გაირკვევა ზარალის ოდენობაც, ასევე დასკვნის საფუძველეზე დაიწყება კორპუსის გამაგრებითი ან სხვა სახის სამუშაოები.

„სამხარაულის ექსპერტიზის ბიურომ დაიწყო მუშაობა გუშინ მდგრადობასთან და ზარალის დადგენის მიმართულებით და რამდენიმე დღეში გვექნება მათი ოფიციალური დასკვნა. ამ დასკვნის შემდეგ მოხდება ტერიტორიის დასუფთავება, კომუნიკაციების ნახვა და იმის შემდეგ დაიგეგმება უკვე გამაგრებითი ან სხვა სამუშაოები, რომლებიც უნდა ჩატარდეს. გვქონდა ჩვენ შეხვედრა მოსახლეობის ნაწილთან და ვფიქრობთ, რომ ის ოჯახებს, სადაც მცირეწლოვანი ბავშვები არიან, გადავიყვანოთ საცხოვრებელ სახლებში დროებით, სანამ არ დაბრუნდებიან თავის სახლში იმიტომ, რომ იწყება სკოლებში სწავლის პროცესი.“ - განაცხადა გაიოზ ვასაძემ.

დიდ დიღომში ავთანდილის #8-ში მდებარე კორპუსის მცხოვრებლებმა 16 იანვარს ყაზტრანსგაზის თანამშრომლები მას შემდეგ გამოიძახეს, რაც ბუნებრივი აირის მძაფრი სუნი იგრძნეს, თუმცა, ყაზტრანსგაზის თანამშრომლებმა მათ განუცხადეს, რომ გაყვანილობა წესრიგშია და გაზის გაჟონვა არ ხდება, რამდენიმე საათში კორპუსში დაგროვილი გაზის გამო აფეთქება მოხდა, რამაც 4 ადამიანის, მათ შორის მცირეწლოვანის სიცოცხლე იმსხვერპლა, დაშავდა 8 ადამიანი. თბილისის მუნიციპალური ლაბორატორიის დასკვნის თანახმად მეექვსე სართულზე სადაც უშუალოდ აფეთქება მოხდა მესამე ხარისხის დაზიანებაა, ხოლო შენობის დანარჩენი ნაწილზე დაზიანებები პირველი ხარისხისაა.