ინფრასტრუქტურის მინისტრი მაია ცქიტიშვილი "გაზპრომთან" დაკავშირებით, ოპოზიციის ბრალდებებს პასუხობს.

მისი თქმით, ამ თემაზე საქართველოს მთავრობა ქვეყნის ინტერესებიდან გამომდინარე იმოქმედებს.

„როგორც ვიცე პრემიერი და ამ მთავრობის წევრი, რა თქმა უნდა, პირველ რიგში, იმას ვიტყვი, რომ ჩვენ არც ერთხელ არ მიგვიღია ისეთი გადაწყვეტილება, რომელიც ჩვენს ქვეყანას დააზიანებდა. ასეთი სპეკულაციები ოპოზიციის მხრიდან არაერთხელ გვსმენია უშუალოდ "გაზპრომთან" მიმართებაშიც და როგორც ვნახეთ, არც ერთხელ არ ავყოლილვართ არც კაბალურ პირობებს, არც განსაკუთრებული ზეწოლის ქვეშ არ ვყოფილვართ არასდროს, ჩვენ ჩვენს გადაწყვეტილებებს ვიღებთ ისე, როგორც ეს შეესაბამება, რა თქმა უნდა, კანონმდებლობას და რაც შეესაბამება, ჩვენს რწმენასაც" - აღნიშნა მინისტრმა.