სოფლის მეურნეობის მინისტრი ყურძნის ჩაბარების პროცესს ეცნობა

ბიზნესი & ეკონომიკა - 21:13, 17 Sep, 2013

1921

სოფლის მეურნეობის მინისტრმა შალვა ფიფიამ, მინისტრის პირველმა მოადგილემ დავით შერვაშიძემ და ღვინის ეროვნული სააგენტოს თავმჯდომარემ ლევან დავითაშვილმა თელავის მუნიციპალიტეტში ღვინის საწარმოები დაათვალიერეს და ღვინის საწარმოებში ყურძნის ჩაბარების პროცესს გაეცნენ. კახეთის რეგიონში რთველი აქტიურ ფაზაშია და ყურძნის გადამამუშავებელი საწარმოებიც სრული დატვირთვით მუშაობენ.

,,საქართველოში წელს ყურძნის კარგი მოსავალია. ათეული წლების მანძილზე, რთველი 2013-ის ფარგლებში, წელს პირველად ერთ დღეში 4000 ტონა ყურძენი გადამუშავდა. წლევანდელი რთველი გარდამავალი ეტაპი იქნება მეღვინეობა-მევენახეობის დარგის განვითარებაში. სახელმწიფო მაქსიმალურად შეუწყობს ხელს ჯანსაღ კონკურენციას და საბაზრო პირობებს“, - განაცხადა შალვა ფიფიამ.

სოფლის მეურნეობის მინისტრი ღვინის კომპანიების - ,,შუმის“, ,,წინანდლის ძველი მარნისა“ და ,,თელავის ღვინის მარნის“ ს
აწარმოებში იმყოფებოდა. აღნიშნული კომპანიები მონაწილეობენ შეღავათიანი აგროკრედიტის პროექტში, რომლის ფარგლებშიც საწარმოების გაფართოება-გადაიარაღების და წარმოების გაზრდის საშუალება მიეცათ.
კომპანია ,,შუმი“ წელს 1200 ტ ყურძნის (800 ტ საფერავი და 400 ტ რქაწითელი და მწვანე) გადამუშავებას გეგმავს. დღეისათვის კომპანიამ საერთო ჯამში უკვე გადაამუშავა 670 ტ ყურძენი. ,,შუმის“ პროდუქცია ექსპორტზე რუსულ ბაზარზეც გადის. უკვე ექსპორტირებულია 32 000 ბოთლი ღვინო.

,,წინანდლის ძველი მარანი“ წელს 2000 ტონა ყურძნის გადამუშავებას გეგმავს. ამ ეტაპზე საწარმოში უკვე გადაამუშავეს 1300 ტონა. კომპანიამ პროდუქციის ექსპორტი რუსულ ბაზარზეც დაიწყო. უკვე ექსპორტირებულია 60 000 ბოთლი ღვინო. 30 000 ბოთლი უახლოეს დღეებში გაიგზავნება.

,,თელავის ღვინის მარანის“ საწარმოში უკვე გადამუშავდა 4000 ტონა ყურძენი. საერთო ჯამში კომპანია 6 400 ტონა ყურძენს გადაამუშავებს.

სოფლის მეურნეობის მინისტრი ადგილობრივ მოსახლეობასაც შეხვდა და თელავის მუნიციპალიტეტში რთველის მიმდინარეობის შესახებ ინფორმაცია პირადად მათგან მოისმინა.