მართლმსაჯულების რეფორმირება - „ევროპული საქართელო“ ინიციატივებით გამოდის და პარლამენტს რეზოლუციის მიღებას მოუწოდებს

პოლიტიკა - 12:28, 16 Jan, 2019

728

„ევროპული საქართელოს“ ლიდერებმა, მართლმსაჯულების რეფორმის საკითხზე რამდენიმე ინიციატივა გააჟღერეს.

საპარლამენტო უმცირესობის ინიციატივით, უმაღლესმა საკანონმდებლო ორგანომ უნდა მიიღოს დადგენილება, რომლითაც იუსტიციის უმაღლეს საბჭოს მოუწოდებს მათ მიერ წარმოდგენილი სიის უკან გაწვევას.

ამავე ინიციატივის მიხედვით, უზენაესი სასამართლოს მოსამართლეობის კანდიდატთა შერჩევის კრიტერიუმებად დამატებით განისაზღვროს:

ა) ადამიანის უფლებათა ევროპული სასამართლოს მიერ დადგენილი დარღვევა, რომელშიც იკვეთება კანდიდატის როლი;

ბ) ავტორიტეტული საერთაშორისო ინსტიტუტებისა და სადამკვირვებლო ორგანიზაციების კრიტიკული დასკვნები და გადაწყვეტილებები, რომლებიც უკავშირდება კანდიდატის მიერ მიღებულ აქტებს.

კანდიდატების კანონმდელობის მოთხოვნებთან შესაბამისობის დადგენის მიზნით, იურიდიულ კომიტეტთან შეიქმნას სამუშაო ჯგუფი, შემდეგი წესით:

ა) მის მუშაობაში, დეპუტატების გარდა, ჩაერთონ ადვოკატთა ასოციაციის, სახალხო დამცველისა და არასამთავრობო ორგანიზაციათა წარმომადგენლები;

ბ) ჯგუფს ჰქონდეს უფლება, საჭიროებისამებრ, გაესაუბროს კანდიდატებს; გ) ჯგუფის მიერ შემუშავებული დასკვნა გასაჯაროვდეს და წარედგინოს იურიდიულ კომიტეტს განსახილველად“, – აღნიშნულია ინიციატივაში.

ინიციატივის მიხედვით, რეგლამენტში უნდა გაიწეროს უზენაესი სასამართლოს მოსამართლეობის კანდიდატთა შერჩევის წესი.