„მოვედით გზაგასაყარზე, როცა კლანმა შეიძლება, განიმტკიცოს სასამართლო ხელისუფლება" - დოლიძე და ჯანეზაშვილი დეპუტატებს შეხვდნენ

პოლიტიკა - 16:33, 15 Jan, 2019

845

უზენაესი სასამართლოს დაკომპლექტებასთან დაკავშირებით იუსტიციის უმაღლესი საბჭოს არამოსამართლე წევრებს ნაზი ჯანეზაშვილსა და ანა დოლიძეს „ქართული ოცნების“ სამი წევრი შეხვდა.

შეხვედრის მთავარი თემა სასამართლო სისტემის გასაჯანსაღებლად საკანონმდებლო ცვლილებების შემოღება იყო.

ისინი კატეგორიულად ეწინააღმდეგებიან უზენაეს სასამართლოში უვადოდ განსამწესებელ იმ მოსამართლეთა 10-კაციან სიას, რომელსაც საპარლამენტო უმრავლესობაშიც დიდი დაპირისპირება მოჰყვა.

„ჩვენ მოვედით დღეს გზაგასაყარზე, როდესაც შეიძლება კლანმა საბოლოო ჯამში განიმტკიცოს სასამართლო ხელისუფლება და ჩააცემენტოს საკუთარი თავი სამარადჟამოდ. მე ვფიქრობ, ეს გამოწვევა ესმის დეპუტატებს და მათ ესმით, რომ ქართველი ხალხისთვის ეს არის უპირველესი დაკვეთა. ეს ბრძოლა იქნება ბოლომდე და, რა თქმა უნდა, როგორც დავიწყეთ ეს ბრძოლა, ისევე გავაგრძელებთ მას მე და ნაზი ჯანეზაშვილი,“- განაცხადა ანა დოლიძემ.

იუსტიციის უმაღლესი საბჭოს არამოსამართლე წევრები მოსამართლეთა სიასთან დაკავშირებით მზად არიან, ყველა დაინტერესებულ ჯგუფს შეხვდნენ.

„თუ ვინმეს არ უნდა, რომ სიაში არ მოხვდეს ისევ გვრიტიშვილი, მიქაუტაძე, ჩინჩალაძე და სხვები და არ მივიღოთ აი, ასეთი ფორმით წარდგენილი სია, მაშინ საკანონმდებლო წინადადებას მხარს დაუჭერენ, რადგან აქ არის მინიმალური სტანდარტები წარმოდგენილი. ჩვენ მზად ვართ, რომ შევხვდეთ ყველა დაინტერესებულ მხარეს. უახლოეს დღეებში იგეგმება სხვა შეხვედრებიც და მზად ვართ, რომ ყველას ვესაუბროთ იმ პრობლემებზე, რომელიც საბჭოშია და იმ დამცავ მექანიზმებზე, რომლებიც უნდა შემუშავდეს იმისთვის, რომ ისევ ისეთი სია არ მივიღოთ, როგორიც ჩვენ გვაქვს,“- განაცხადა ნაზი ჯანეზაშვილმა.